Assam Book Fair 2022: ধেমাজিত অসম গ্ৰন্থমেলা উদ্বোধন কৰিলে মন্ত্ৰী পেগুৱে

ধেমাজি কাছাৰী ময়দানত আজি অৰ্থাৎ শুকুৰবাৰৰ পৰা অসম প্ৰকাশন পৰিষদ, সদৌ অসম পুথি প্ৰকাশক আৰু বিক্ৰেতা সংস্থাৰ অসম গ্ৰন্থমেলা অনুষ্ঠিত হৈছে(Assam Book Fair 2022) ৷ এক গাম্ভীৰ্যপূৰ্ণ অনুষ্ঠানৰ মাজত আজি সন্ধিয়া বন্তি প্ৰজ্বলন কৰি গ্ৰন্থমেলাখনি মুকলি কৰে অসমৰ শিক্ষামন্ত্ৰী তথা অসম প্ৰকাশন পৰিষদৰ অধ্যক্ষ ডাঃ ৰণোজ পেগুৱে(Education Minister Ronuj Pegu) ৷ অনুষ্ঠানত শিক্ষামন্ত্ৰীগৰাকীৰ লগতে অসম সাহিত্য সভাৰ সভাপতি কুলধৰ শইকীয়া, ড৹ প্ৰদীপজ্যোতি মহন্ত উপস্থিত থাকে ৷ সভাত ৰাইজক কিতাপ কিনিবলৈ আহ্বান জনায় মন্ত্ৰীগৰাকীয়ে কয় যে কিতাপ কিনি সজাই থোৱাটো বেয়া কথা নহয় ৷ কাৰণ এই কিতাপ পৰিয়ালৰ কোনো সদস্যই অথবা প্ৰজন্মই পঢ়িব পাৰিব । আনহে নালাগে নিজে পঢ়া বিদ্যালয়খনতো কিতাপকেইখন দি দিব পাৰিব । সেয়ে ধেমাজি গ্ৰন্থমেলাত অভিলেখসংখ্যক এক কোটি গ্ৰন্থ বিক্ৰী হোৱাটো কামনা কৰে শিক্ষামন্ত্ৰীগৰাকীয়ে ৷