২০০০ চনত আন্তঃৰাষ্ট্ৰীয় ফেডাৰেচন অৱ ৰেড ক্ৰছ এণ্ড ৰেড ক্ৰেচেণ্ট ছ’চাইটি (আই এফ আৰত চি)ৰ উদ্যোগত পোন প্ৰথমে বিশ্ব প্ৰাথমিক চিকিৎসা দিৱস পালন কৰা হয় ৷ তেতিয়াৰ পৰাই প্ৰতি বছৰে ছেপ্টেম্বৰৰ দ্বিতীয় শনিবাৰে বিশ্ব প্ৰাথমিক চিকিৎসা দিৱস পালন কৰা হয় ৷ ইয়াৰ উদ্দেশ্য হৈছে দৈনন্দিন জীৱনৰ সংকটজনক পৰিস্থিতিত প্ৰাথমিক চিকিৎসাৰ জৰিয়তে মানুহক কেনেকৈ সহায় কৰিব পাৰি সেই বিষয়ে মানুহক সচেতন কৰা ৷ সেইবাবেই প্ৰতি বছৰে এই উপলক্ষে মানুহক প্ৰাথমিক চিকিৎসাৰ উপকাৰিতা, প্ৰাথমিক চিকিৎসাৰ প্ৰয়োজনীয়তা আৰু ঘৰতে প্ৰাথমিক চিকিৎসাৰ কিট ৰখাৰ বিষয়ে সজাগ কৰা হয় ৷
প্ৰাথমিক চিকিৎসাৰ কিয় প্ৰয়োজন: বিদ্যালয়ত শিশুসকলক প্ৰাথমিক চিকিৎসাৰ বিষয়ে শিকোৱা হয়, কিন্তু সময়ৰ লগে লগে মানুহে স্বাস্থ্যৰ বাবে এই গুৰুত্বপূৰ্ণ কথাবোৰ পাহৰি যায় ৷ কিন্তু ইয়াৰ বিষয়ে জনাটো অতি প্ৰয়োজনীয়, যাতে কোনো দুৰ্ঘটনা সংঘটিত হ’লে প্ৰাথমিক চিকিৎসাৰ জৰিয়তে আঘাতপ্ৰাপ্ত ব্যক্তিগৰাকীৰ জীৱন ৰক্ষা কৰিব পৰা যায় ৷ এনে পৰিস্থিতিত সকলোৰে বাবে প্ৰাথমিক চিকিৎসাৰ বিষয়ে জনাটো অতি প্ৰয়োজনীয় ৷
প্ৰাথমিক চিকিৎসা কি: প্ৰাথমিক চিকিৎসা কি আৰু প্ৰাথমিক চিকিৎসাৰ বাবে কি প্ৰয়োজন হ’ব পাৰে সেই বিষয়ে বুজাটো গুৰুত্বপূৰ্ণ ৷ যাতে আপুনি তৎকালীন প্ৰাথমিক চিকিৎসাৰ ব্যৱস্থা কৰিব পাৰে ৷ প্ৰাথমিক চিকিৎসা হ’ল কোনো ৰোগী আৰু আঘাতপ্ৰাপ্ত ব্যক্তিক চিকিৎসা সেৱা লাভ কৰাৰ আগতে দিয়া চিকিৎসা ৷ ইয়াৰ বাবে প্ৰাথমিক চিকিৎসাৰ বাকচত কেইটামান বস্তু থাকিব লাগে ৷ যেনেকৈ ঘাঁ পৰিষ্কাৰ কৰিবলৈ ডেটল থাকিব লাগে ৷ কপাহ আৰু বেণ্ডেজও আপোনাৰ বাকচত ৰাখিব লাগে ৷ কেঁচি, চিকিৎসা বিজ্ঞানত প্ৰমাণিত ক্ৰীম, হেণ্ড চেনিটাইজাৰ, বিষ নিৰাময় ঔষধো উপলব্ধ হ’ব লাগে ৷ হাৰ্ট এটেক বা ষ্ট্ৰোক হ’লে ৰোগীৰ তেজ পাতল কৰিবলৈ এছপিৰিন টেবলেট আৰু থাৰ্মোমিটাৰ আদি থকাটো প্ৰয়োজন ইয়াৰ উপৰিও চিকিৎসালয়ৰ জৰুৰীকালীন ফোন নম্বৰটোও থাকিব লাগে ৷
প্ৰাথমিক চিকিৎসা কেতিয়া দিয়া হয় ? প্ৰায়ে সময়মতে প্ৰাথমিক চিকিৎসাৰ অভাৱত দুৰ্ঘটনাত আঘাতপ্ৰাপ্ত ব্যক্তিজনৰ মৃত্যু হয় ৷ ইয়াৰ বাবে প্ৰাথমিক চিকিৎসাৰ অংশ হিচাপে আঘাতপ্ৰাপ্ত ব্যক্তিজনক চিকিৎসালয়লৈ নিয়াৰ আগলৈকে আঘাতপ্ৰাপ্ত ব্যক্তিজনৰ ঘাঁ পৰিষ্কাৰ কৰি বেণ্ডেজ কৰা হয় যাতে ৰক্তক্ষৰণ নহয় ৷ একে সময়তে হৃদযন্ত্ৰৰ লগত জড়িত সমস্যা বা আন কোনো সমস্যা যেনে বিষ আদিৰ ক্ষেত্ৰত চিকিৎসালয় পোৱাৰ আগতে যি প্ৰাথমিক চিকিৎসা দিয়া হয় তাক প্ৰাথমিক চিকিৎসা বোলা হয় ৷
প্ৰাথমিক চিকিৎসাৰ উদ্দেশ্য:
- আহত ব্যক্তিৰ প্ৰাণ ৰক্ষা কৰা
- আঘাতপ্ৰাপ্ত ব্যক্তিক বেয়া পৰিস্থিতিৰ পৰা উলিয়াই অনা
- স্বাস্থ্য উন্নতিৰ প্ৰসাৰ
লগতে পঢ়ক: Home Remedies for Sinuses: ছাইনাছৰ পৰা সকাহ পাবলৈ অনুসৰণ কৰক এইসমূহ ঘৰুৱা প্ৰতিকাৰ
