ওদালগুৰি, ১১ জুলাই :অন্ধবিশ্বাসৰ বশৱৰ্তী হৈ কলাইগাঁৱৰ কুলশীপাৰৰ যাদৱ চন্দ্ৰ চহৰীয়াৰ পৰিয়ালে সংঘটিত কৰা ঘটনাত ইজনৰ পাছত সিজনৰ নাম সাঙোৰ খাইছে । ৰাজ্য জোকাৰি যোৱা এই ঘটনাত অভিযুক্ত ৰমেশ চহৰীয়াক আৰক্ষীয়ে গ্ৰেপ্তাৰ কৰাৰ পাচত এইবাৰ নাম ওলাইছে আন এজন তান্ত্ৰিকৰ । তেওঁৰ নাম কাজল ভূঞা ।
কাজল ভূঞাৰ ঘৰ ছিপাঝাৰৰ কদমতলীত । বেজালি কৰিয়েই জীৱন নিৰ্বাহ কৰে ভূঞাই । দৰং আৰক্ষীয়ে তেওঁক বিচাৰি কদমতলীৰ ঘৰলৈ গৈছে যদিও কলাইগাঁৱৰ ঘটনাৰ পাচত যোৱা তিনিদিন ধৰি পলাতক হৈ আছে ভূঞা । ইপিনে , সম্প্ৰতি আৰক্ষীৰ জিম্মাত থকা ৰমেশ চহৰীয়াৰ মুখেৰেও ওলাইছে কাজল ভূঞা সম্পৰ্কত কেতবোৰ কথা । ৰমেশ চহৰীয়াৰ ভাষ্য অনুসৰি ঘটনাৰ এসপ্তাহমানৰ আগত ভূঞাই পুলকেশ চহৰীয়াক এটা বৰাহৰ দাঁত দিছিল আৰু সেইটোৰ কাৰণেই পৰিয়ালটোৱে এনে অস্বাভাৱিক আচৰণ কৰিলে । ৰমেশ চহৰীয়াই জানিবলৈ দিয়া মতে প্ৰায় এবছৰৰ পূৰ্বে শিক্ষক যাদৱ চহৰীয়াৰ পৰিয়ালৰ লগত কাজল ভূঞাৰ চা-চিনাকী হৈছিল । ৰমেশ চহৰীয়াই নিতৌ পূজা কৰা মন্দিৰলৈ যাওতে কাজল ভূঞাক পৰিয়ালটোৱে লগ পাইছিল আৰু তেওঁলোকৰ মাজত সু সম্পৰ্ক স্থাপন হৈছিল । ইয়াৰ পাচৰে পৰা কাজল ভূঞাই যাদৱ চহৰীয়াৰ পৰিয়ালক বিধান দিয়া আৰম্ভ কৰিছিল । অন্ধবিশ্বাসে চানি ধৰি থকা শিক্ষকজনৰ পৰিয়ালেও তেতিয়াৰ পৰা ৰমেশ চহৰীয়াৰ উপৰিও তান্ত্ৰিক ভূঞাৰ পৰাও বিভিন্ন সমস্যা সন্দৰ্ভত পৰামৰ্শ লোৱা আৰম্ভ কৰিছিল । শনিবাৰে ঘটনাটো সংঘটিত হোৱাৰ পাচৰে পৰা যাদৱ চহৰীয়াৰ পৰিয়ালে তান্ত্ৰিক ৰমেশ চহৰীয়াক দোষাৰোপ কৰিছে । কিন্তু ৰমেশ চহৰীয়াই আকৌ তেওঁৰেই সহযোগী কাজল ভূঞাৰ গালৈ দায় ঠেলিছে । কিন্তু কি যাদৱ চহৰীয়াৰ পৰিয়াল, কি ৰমেশ চহৰীয়া সকলোৰে কথাৰ আধাৰ কেৱল অলৌকিক ।
ইপিনে শনিবাৰে যাদৱ চহৰীয়াৰ পৰিয়ালক কৰায়ত্ত কৰিবলৈ আৰক্ষীয়ে গুলীচালনা কৰিবলগীয়া হৈছিল । যি ঘটনাত যাদৱ চহৰীয়াৰ পুত্ৰ পুলকেশৰ চিকিৎসালয়ত মৃত্যু হোৱাৰ লগতে যাদৱ চহৰীয়া এতিয়াও চিকিৎসাধীন হৈ আছে । ওদালগুৰিৰ জিলা উপায়ুক্তই অতিৰিক্ত জিলা দণ্ডাধীশ তথা ভেৰগাঁৱৰ ভাৰপ্ৰাপ্ত মহকুমাধিপতিক এই ঘটনাৰ তদন্ত কৰাৰ নিৰ্দেশ দিছে । গুলীচালনাৰ সময়ৰ চাক্ষুক অভিজ্ঞতা থকা কোনো ইচ্ছুক ব্যক্তিয়ে ঘটনাৰ সাক্ষী বা জবানবন্দী দিব বিচাৰিলে ১০ জুলাইৰ পৰা ১২ জুলাইলৈকে দিনৰ ১০ বজাৰ পৰা ১ বজালৈ ভেৰগাঁও মহকুমাধিপতিৰ কাৰ্যালয় কক্ষত যোগাযোগ কৰিবলৈ প্ৰশাসনে আহ্বান জনাইছে ।
