ওদালগুৰি, 17 মে’: অসম চৰকাৰৰ প্ৰভাৱশালী মন্ত্ৰী তথা বিপিএফৰ দলৰ শক্তিশালী নেতা ৰিহণ দৈমাৰীয়ে বিজেপিত যোগদান কৰিব বুলি বিটিচিত ব্যাপক চৰ্চা লাভ কৰাৰ সময়তে বিজেপিত যোগদান কৰা কথা অস্বীকাৰ কৰে । শনিবাৰে ওদালগুৰিত সাংবাদিকৰ আগত নিজৰ মতামত দাঙি ধৰি তেওঁ এই সমগ্ৰ ঘটনাক নস্যাৎ কৰি কয় যে, তেওঁ যিহেতু বৰ্তমান ওদালগুৰি জিলাৰ বিপিএফ দলৰ সভাপতি, গতিকে তেওঁ বিজেপিলৈ যোৱাৰ প্ৰশ্নই নুঠে ৷ লগতে তেওঁৰ এনেকুৱা কোনো ধৰণৰ পৰিকল্পনা নাই বুলি জানিবলৈ দিয়ে ৷
আনহাতে মন্ত্ৰী ৰিহণ দৈমাৰীৰ সৈতে বিপিএফ দলৰ সাধাৰণ সম্পাদক ইমানুৱেল মুছাহাৰীয়েও বিজেপিত যোগদান কৰিব বুলি বিটিচিত চৰ্চা লাভ কৰিছিল । ইয়াৰ পিছতে এক প্ৰকাৰৰ চাঞ্চল্যৰ সৃষ্টি হৈছিল বিটিচিৰ ৰাজনীতিত । বিশেষকৈ মন্ত্ৰী ৰিহণ দৈমাৰী বিজেপিত যোগদান কৰিলে বিটিচিত হাগ্ৰামা মহিলাৰী প্ৰৱল প্ৰত্যাহ্বানৰ সন্মুখীন হ'ব বুলি চৰ্চা চৰ্চিত ৰাইজৰ মাজত ৷ কিয়নো ২০১৫ চনত অনুষ্ঠিত হোৱা বিটিচি নিৰ্বাচনত হাগ্ৰামা মহিলাৰীক পুনৰ শাসনলৈ অনাত অন্যতম ভূমিকা পালন কৰিছিল ৰিহণ দৈমাৰীয়ে ।
উল্লেখ্য যে, কোকৰাঝাৰ, চিৰাং আৰু বাক্সা জিলাত বিপিএফ দলে প্ৰৱল প্ৰত্যাহ্বানৰ সন্মুখীন হৈ বেছি সংখ্যক আসন হেৰুৱাৰ পিছতো মন্ত্ৰী ৰিহণ দৈমাৰীৰ গৃহ জিলা ওদালগুৰিত থকা ১০ খন আসনৰ ভিতৰত ৯ খন আসনতে জয়ী হৈছিল বিপিএফ দলে । মন্ত্ৰী দৈমাৰীৰ দৰে প্ৰভাৱশালী নেতা এজনে বিপিএফ ত্যাগ কৰি বিজেপিত যোগদান কৰিলে বিটিচিত ধুমুহাৰ সৃষ্টি হ'ব বুলি আশংকা প্ৰকাশ কৰিছিল ৰাজনৈতিক মহলে ৷
লগতে পঢ়ক : নতুনকৈ নিলাম হ'ব ছয়টাকৈ বিমানবন্দৰঃ নিৰ্মলা সীতাৰমণ
