ওদালগুৰি,13 মে': ওদালগুৰি জিলাৰ ওৰাঙৰ কলাগুৰু বিষ্ণুৰাভা মহাবিদ্যালয়ৰ কাষত ১৫নং ৰাষ্ট্ৰীয় ঘাই পথত সোমবাৰে এক ভয়ংকৰ পথ দুৰ্ঘটনা সংঘটিত হয়। এই দুৰ্ঘটনাত এজন লোক থিতাতে নিহত হোৱাৰ লগতে গুৰুতৰভাৱে আহত হয় এজন কিশোৰ।
জানিব পৰা মতে ওৰাঙৰ পৰা ঢেকীয়াজুলি অভিমুখে গৈ থকা AS-12AC-0858 নম্বৰৰ "মা কামাখ্যা"নামৰ আল্ট্ৰা বাছ আৰু বিপৰীত দিশৰ পৰা আহি থকা AS-01AQ-0283 নম্বৰৰ মাৰুতি ছুজুকি বাহন দুখনৰ মাজত মুখা মুখিকৈ সংঘৰ্ষ হোৱাৰ ফলত থিতাতে নিহত হয় নলবাৰীৰ নৰেণ বৈশ্য নামৰ লোকজন। দুৰ্ঘটনাটোত গুৰুতৰ ভাৱে আহত হয় তেওঁৰ পুত্ৰ শুভম বৈশ্য। পিছত ঘটনাস্থলীত ওৰাং আৰক্ষী উপস্থিত হৈ ব্যক্তি দুজনক চিকিৎসাৰ বাবে ওৰাং প্ৰাথমিক চিকিৎসালয়লৈ প্ৰেৰণ কৰাত নৰেণ বৈশ্যক চিকিৎসকে মৃত বুলি ঘোষণা কৰে। গুৰুতৰভাৱে আহত কিশোৰজনক উন্নত চিকিৎসাৰ বাবে তেজপুৰ চিকিৎসা মহাবিদ্যালয়লৈ প্ৰেৰণ কৰে।
