কাজিৰঙা: বিশ্বৰ পৰ্যটন মানচিত্ৰত জিলিকিছে অসম । ২০২৫ চনত নিউয়ৰ্ক টাইমছে প্ৰকাশ কৰা বিশ্বৰ ৫২ খন পৰ্যটন ক্ষেত্ৰৰ তালিকাত অন্তৰ্ভুক্ত হৈছে অসমৰ দুই পৰ্যটন ক্ষেত্ৰ ।
বিশ্বৰ আগশাৰীৰ এই কাকতৰ সমীক্ষাৰ তালিকাত বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান আৰু শেহতীয়াকৈ ইউনেস্ক’ৰ বিশ্ব ঐতিহ্যক্ষেত্ৰৰ তালিকাত অন্তৰ্ভুক্ত হোৱা চৰাইদেউক চতুৰ্থ স্থান দিয়া হৈছে ।
সমগ্ৰ ভাৰতৰ ভিতৰত অসমে আন্তঃৰাষ্ট্ৰীয় পৰ্যায়ত চতুৰ্থ স্থান দখল কৰাত আনন্দৰ বন্যা বৈছে কাজিৰঙাত । স্বাভাৱিকতে কাজিৰঙা ৰাষ্ট্ৰীয় উদ্যান কৰ্তৃপক্ষৰ লগতে কাজিৰঙা পৰ্যটন উদ্যোগৰ লগত জড়িত সকলোকে আনন্দ দিছে এই খবৰে । উল্লেখ্যে যে পূৰ্বে ৰাষ্ট্ৰীয় পৰ্যায়ত দহখন আইকনিক স্থানৰ ভিতৰত কাজিৰঙা ৰাষ্ট্ৰীয় উদ্যানে স্থান লাভ কৰিবলৈ সক্ষম হৈছিল ।
ইপিনে, বিগত সময়ত কাজিৰঙা ৰাষ্ট্ৰীয় উদ্যানলৈ দেশৰ দুগৰাকীকৈ ৰাষ্ট্ৰপতি, প্ৰধানমন্ত্ৰী মোদী, লোকসভাৰ অধ্যক্ষ, ভূটানৰ ৰজাৰ ভ্ৰমণে কাজিৰঙাক আন্তৰাষ্ট্ৰীয় পৰ্যায়ত নতুন ৰূপত পৰিচয় কৰায় । এই সন্দৰ্ভত কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ ক্ষেত্ৰ সঞ্চালক ড৹ সোণালী ঘোষে কয়, "কাজিৰঙাক বিশ্বৰ এখন আগশাৰীৰ পত্ৰিকাই স্থান দিয়াটো স্বাভাৱিকতে গুৰুত্বপূৰ্ণ বতৰা । ইয়াৰ বাবে সকলোপক্ষকে ধন্যবাদ ।"
কাজিৰঙালৈ সম্প্ৰতি যথেষ্ট পৰ্যটকৰ আগমন ঘটিছে । ২০২৪-২৫ পৰ্যটন বৰ্ষৰ যোৱা তিনি মাহত ১,৬৪,৬৩৬ দেশী-বিদেশী পৰ্যটকে কাজিৰঙা ৰাষ্ট্ৰীয় উদ্যান ভ্ৰমণ কৰিছে বুলি ক্ষেত্ৰ সঞ্চালকগৰাকীয়ে উল্লেখ কৰে । তেওঁ লগতে কয়, "ইয়াৰে ছয় সহস্ৰাধিক বিদেশী পৰ্যটকে কাজিৰঙা ভ্ৰমণ কৰিছে । আনহাতে, পৰ্যটকৰ পৰা কাজিৰঙা বন বিভাগে ৪ কোটি ৩২ লাখ টকাৰ ৰাজহ লাভ কৰিছে ।"
