নিউজ ডেস্ক, ৫ জুলাই: জাপানীজ এনকেফেলাইটিছত আক্ৰান্ত হৈ ডিমা হাছাওত এজনৰ মৃত্যু । বৰ্তমানলৈকে সমগ্ৰ ৰাজ্যত জাপানীজ এনকেফেলাইটিছত আক্ৰান্ত হৈ মৃত্যুৰ সংখ্যা ৫০ জনলৈ বৃদ্ধি । ডিমা হাছাও জিলাৰ মাইবাং মহকুমাৰ অন্তৰ্গত হাতীখালিৰ কুঞ্জলতা হাকমুকছা নামৰ 60 বছৰীয়া মহিলা গৰাকী মৃত্যু হয় ৷ হাফলং অসামৰিক চিকিৎসালয়ত মৃত্যু হয় মহিলা গৰাকীৰ ।
আনহাতে, চিৰাঙত এজন এনকেফেলাইটিছ ৰোগীৰ লগতে 31 জন মেলেৰীয়া ৰোগী চিনাক্ত ৷ 30 জুনলৈ 31 জন মেলেৰীয়া ৰোগী চিনাক্ত হোৱাৰ লগতে এজন জাপানীজ এনকেফেলাইটিছ ৰোগী চিনাক্ত হোৱা বুলি জনাইছে জিলা মেলেৰীয়া বিভাগে । জিলা মেলেৰীয়া নিয়ন্ত্ৰণ বিভাগৰ সূত্ৰই প্ৰকাশ কৰা অনুসৰি জুন মাহৰ 30 তাৰিখলৈকে জিলাখনত ইতিমধ্যে মুঠ 33253 জন লোকৰ তেজৰ নমুনা সংগ্ৰহ কৰা হৈছে ।
উল্লেখ্য যে, সম্প্ৰতি ৰাজ্যৰ বিভিন্ন জিলাত ব্যাপকভাৱে প্ৰাদুৰ্ভাৱ ঘটা জাপানীজ এনকেফেলাইটিছ ৰোগৰ প্ৰতিৰোধৰ বাবে বিশ্বনাথ জিলা প্ৰশাসনে বিশেষ তৎপৰতা গ্ৰহণ কৰিছে। জিলাখনত এই পৰ্যন্ত কোনো লোক এই ৰোগত আক্ৰান্ত হৈ চিকিৎসাধীন হোৱাৰ খবৰ অহা নাই যদিও উপায়ুক্ত পৱিত্ৰ ৰাম খাউণ্ডৰ নিৰ্দেশ অনুযায়ী জিলাখনৰ স্বাস্থ্য বিভাগক এই ক্ষেত্ৰত পূৰ্ণ পৰ্যায়ৰ সতৰ্কতা অৱলম্বন কৰিবলৈ কোৱা হৈছে । জনসাধাৰণক এই ৰোগৰ কাৰণ আৰু লক্ষণসমূহৰ বিষয়ে সজাগ কৰাৰ উদ্দেশ্যে স্বাস্থ্য বিভাগে বেনাৰ লগোৱা , প্ৰচাৰ পত্ৰ বিতৰণ আদি কাৰ্যসূচীও গ্ৰহণ কৰিছে । শোণিতপুৰ জিলাৰ যুটীয়া স্বাস্থ্য সেৱা সঞ্চালিকাগৰাকীয়ে ইতিমধ্যেই জাৰি কৰা এক নিৰ্দেশযোগে অত্যন্ত জিলাখনৰ চিকিৎসক-নাৰ্চ-স্বাস্থ্যকৰ্মীসকলক কোনোধৰণৰ ছুটী নল'বলৈ নিৰ্দেশ প্ৰদান কৰা হৈছে ।
