ডুমডুমা,3 জানুৱাৰী : বিগত 31 ডিচেম্বৰত ডিগবৈৰ টিংৰাইত শোকাৱহ পথ দুৰ্ঘটনাত অকাল মৃত্যুক সাৱটি লোৱা ডুমডুমা ৰূপাই চাইডিঙৰ বিশ্বৰূপা নেওগ মৰাণক শনিবাৰে সন্ধিয়া ৰাজহুৱাভাৱে জনোৱা হয় শ্ৰদ্ধাঞ্জলি ৷ বিভিন্ন সামাজিক কাৰ্যত সক্ৰিয় ভূমিকা পালন কৰা বিশ্বৰূপা নেওগ মৰাণে কা আন্দোলনত ডুমডুমাৰ এগৰাকী মহিলা নেত্ৰীৰূপে নিজকে আত্মনিয়োগ কৰি মহিলা প্ৰতিবাদীসকলক নেতৃত্ব প্ৰদান কৰিছিল ।
উল্লেখ্য যে, দুই পুত্ৰ সন্তানৰ মাতৃ বিশ্বৰূপা নেওগ মৰাণে পুত্ৰক ডিগবৈৰ হোষ্টেলত থৈ স্বামীৰ সৈতে নিজ বাহনত ঘৰমুৱা হোৱাৰ সময়তে বাহনখনে পথৰ দাঁতিৰ এজোপা গছত খুন্দা মাৰে ৷ দুৰ্ঘটনাৰ ফলত থিতাতে মৃত্যু হয় নেত্ৰী গৰাকীৰ ৷
আনহাতে স্বামীক সংকটজনক অৱস্থাত ডিব্ৰুগড় চিকিৎসা মহাবিদ্যালয়ত ভৰ্তি কৰোৱা হয় ৷ বৰ্তমান তেওঁ চিকিৎসাধীন অৱস্থাত আছে ৷ বিশ্বৰূপা নেওগ মৰাণৰ অকাল মৃত্যুত ডুমডুমা, ৰূপাইৰ লগতে সমগ্ৰ তিনিচুকীয়া জিলাতেই শোকৰ ছাঁ পৰিছে ৷
লগতে পঢ়ক : ডুমডুমাত পথ সুৰক্ষাৰ সজাগতা অভিযান
