তিনিচুকীয়া,22 ছেপ্তেম্বৰঃ চৰকাৰৰ শাসনৰ গাদীলৈ আহিল ইটোৰ পিছত সিটো দল ; কিন্তু চাহ শ্ৰমিকৰ দৈনিক মজুৰি একেই থাকিল। ৰাজনৈতিক নেতা সকলে নিৰ্বাচনৰ আগত চাহ শ্ৰমিকক লৈ প্ৰতিশ্ৰুতিৰ ওপৰত দিছিল প্ৰতিশ্ৰুতি ; কিন্তু বাস্তৱত সকলো ফুটুকাৰ ফেন। যাৰ বাবে মঙলবাৰে চাহ মজদুৰ সংঘই চাহ শ্ৰমিকৰ দৈনিক মজুৰি বৃদ্ধিৰ দাবীত তিনিচুকীয়া চক্ৰ বিষয়াৰ কাৰ্য্যালয়ৰ সন্মুখত ১ ঘণ্টীয়া ধৰ্ণা কাৰ্যসূচী ৰূপায়ন কৰে।
তিনিচুকীয়া চাহ মজদুৰ সংঘৰ কাৰ্য্যালয়ৰ পৰা প্ৰায় 2 কিলোমিটাৰ পদযাত্ৰা কৰি জিলা চক্ৰ বিষয়াৰ কাৰ্যালয়ৰ সন্মুখত বিভিন্ন চৰকাৰ বিৰোধী ধ্বনি দি কাৰ্যালয়ৰ চৌপাশৰ পৰিবেশ উত্তাল কৰি তোলে । উল্লেখযোগ্য যে, চাহ শ্ৰমিক সকলে বিভিন্ন সময়ত নিজৰ দৈনিক মজুৰি বৃদ্ধিৰ বাবে চৰকাৰক দাবী জনায় আহিছে যদিও কোনো ধৰণৰ গুৰুত্ব দিয়া নাই চৰকাৰে । তেঁওলোকে চৰকাৰক দাবী জনাই দৈনিক মজুৰি 167 ৰ পৰা 351 টকালৈ বৃদ্ধি কৰিবলৈ দাবী জনায় ৷
