তিনিচুকীয়া, 11 নবেম্বৰ : তিনিচুকীয়া উপায়ুক্ত কাৰ্যালয়ৰ সন্মুখত প্ৰতিবাদ । বাঘজানৰ পাৰ্শ্বৱৰ্তী অঞ্চল নতুন ৰঙাগড়া গাঁৱৰ ৰাইজৰ প্ৰতিবাদত উত্তাল হৈ পৰিল উপায়ুক্তৰ কাৰ্যালয় । ক্ষতিপূৰণ পোৱাৰ দাবীত এই প্ৰতিবাদ ৷ বাঘজানৰ অইলৰ খাদত যি জুই লাগিছিল সেই জুই এতিয়াও জ্বলিয়েই আছে ৷ নিৰ্বাপন কৰিবলৈ সক্ষম হোৱা নাই অইলৰ কৰ্তৃপক্ষ। কিন্তু এতিয়াও অগ্নি নিৰ্বাপনৰ অহৰহ চেষ্টা অব্যাহত ৰাখিছে অইল কৰ্তপক্ষই ।
বাঘজান কাণ্ডই আজি প্ৰায় 5 মাহৰো অধিক সময় অতিক্ৰম কৰিলে ৷ কিন্তু আজিও জ্বলি আছে বাঘজানৰ অভিশপ্ত BGR 5 নং তৈলখাদ । বাঘজান অগ্নি কাণ্ডৰ ফলত পাৰ্শ্বৱৰ্তী অঞ্চলসমূহৰ লগতে মাগুৰি মতাপুং বিল আৰু ডিব্ৰু-চৈখোৱাত বহু প্ৰভাৱ পৰিছে ৷ যাৰ ফলত মাগুৰি বিলৰ মাছৰ সংখ্যা কমিব ধৰিছে আৰু ডিব্ৰু-চৈখোৱা উদ্যানৰ জীৱ-জন্তু, পৰিভ্ৰমী চৰাই চিৰিকতিৰ সংখ্যাও কমিব ধৰিছে।
বুধবাৰে তিনিচুকীয়া উপায়ুক্ত কাৰ্যালয়ৰ সন্মুখত বৃহত্তৰ নতুন ৰঙাগড়া গাঁৱৰ প্ৰায় সাত শতাধিক ৰাইজে নিজৰ ক্ষতিপূৰণ বিচাৰি অইল ইণ্ডিয়াৰ বিৰুদ্ধে উত্তাল প্ৰতিবাদ সব্যস্ত কৰে । যদি অইল ইণ্ডিয়াই তেওঁলোকক নিজৰ ক্ষতিপূৰণ নিদিয়ে তেন্তে এই প্ৰতিবাদ দিছপুৰলৈ লৈ যোৱাৰ হুংকাৰ প্ৰদান কৰে প্ৰতিবাদকাৰীয়ে ।
লগতে পঢ়ক : ত্ৰিপুৰাত অবৈধ ভাং খেতি উচ্ছেদ প্ৰশাসনৰ
