নিৰাপত্তাৰক্ষীৰ বেহুৰ পৰাই পলায়ন কৰিলে চোৰাং কণ্ডেনচেট ভৰ্ত্তি বাহন

বিশেষ সূত্ৰৰ পম খেদি যজ্ঞোখোৱা গাঁৱত বাৰেকুৰি আৰক্ষী থানাৰ আৰক্ষী আৰু উদ্যোগিক নিৰাপত্তাৰক্ষীৰ এটা দ’লে এখন চোৰাং কণ্ডেনচেট ভৰ্ত্তি বাহন জব্দ কৰিবলৈ সক্ষম হয় । কিন্ত, বাহনখন পৰৱৰ্তী সময়ত পলায়ন কৰিবলৈ সক্ষম বুলি জানিব পৰা গৈছে ৷

তিনিচুকীয়া, 29 অক্টোবৰ : তিনিচুকীয়া বাৰেকুৰিত সংঘটিত হৈছে চাঞ্চল্যকৰ ঘটনা ৷ বিশেষ সূত্ৰৰ পম খেদি যজ্ঞোখোৱা গাঁৱত বাৰেকুৰি আৰক্ষী থানাৰ আৰক্ষী আৰু উদ্যোগিক নিৰাপত্তাৰক্ষীৰ এটা দ’লে AS-23CC-5869 নম্বৰৰ এখন চোৰাং কণ্ডেনচেট ভৰ্ত্তি বাহন জব্দ কৰিবলৈ সক্ষম হৈছিল যদিও পৰৱৰ্তী সময়ত সেই স্থানৰ পৰা উধাও হয় ৷

জানিব পৰা মতে, বাহনখন জব্দ কৰা সময়তে প্ৰায় শতাধিক লোকে দা, জোং- জাঠি, গোলটি আদি লৈ ওলাই আহে আৰু আৰক্ষী আৰু অইলৰ নিৰাপত্তাৰক্ষী বাহিনীৰ দলটোক ঘেৰাও কৰি আক্ৰমণ কৰিবলৈ চেষ্টা কৰে ৷ ইয়াৰ লগে লগে উত্তপ্ত পৰিস্থিতিয়ে বিৰাজ কৰে অঞ্চলটোত ৷ ইয়াৰ সুযোগ গ্ৰহণ কৰি পাঁচজন যুৱকে কণ্ডেনচেট ভৰ্ত্তি বাহন লৈ পলায়ন কৰে ৷

নিৰাপত্তাৰক্ষীয়ে বাহনখন ৰখাবলৈ চেষ্টা কৰে যদিও সফল নহ’ল ৷ বাহনখন ৰখাবলৈ বাহনৰ চকালৈ লক্ষ্য কৰি নিৰাপত্তাৰক্ষীৰ দলটোৱে ১২ জাই গুলী নিক্ষেপ কৰে ৷ নিৰাপত্তাৰক্ষীৰ গুলীত বাহনৰ চকাৰ ফুটে যদিও সেই স্থানৰ পৰা বাহনখন উধাও হয় ৷ ইফালে পলায়নৰ সময়ত বাহনখনৰ পৰা কণ্ডেনচেট ভৰ্ত্তি ৭ টাকৈ ড্ৰাম পথত পৰি ৰয় ৷

ইতিমধ্যে ঘটনাস্থলীত বাৰেকুৰি আৰক্ষী থানাৰ আৰক্ষীৰ লগতে অইলৰ নিৰাপত্তা বিভাগৰ শীৰ্ষ বিষয়া উপস্থিত হৈ উধাও কৰা বাহনখনৰ লগতে এই ঘটনাৰ লগত জড়িত লোকৰ সন্ধানত অভিযান আৰম্ভ কৰিছে ৷

লগতে পঢ়ক: ভাৰত-চীন সীমান্তৰ শেষৰখন গাঁৱৰ পৰা আমাৰ বিশেষ প্ৰতিবেদন...