মৰ্ঘেৰিটা, 18 অক্টোবৰঃ তিনিচুকীয়া জিলাৰ জাগুনৰ 6 মাইলত সংঘটিত হৈছে এক ভয়ংকৰ পথ দুৰ্ঘটনা ৷ শুক্ৰবাৰে পুৱাৰ ভাগত সংঘটিত পথ দুৰ্ঘটনাটোত 20গৰাকী ছাত্ৰ ছাত্ৰী আঘাতপ্ৰাপ্ত হয় ৷ ইয়াৰে তিনিগৰাকীৰ অৱস্থা সংকটজনক ৷ উল্লেখ্য যে, পুৱাই লিডুৰ পৰা AS23CC3512 নম্বৰৰ মহিন্দ্ৰা স্কোৰ্পিও পিক আপ গাড়ীখনে 25 গৰাকী ছাত্ৰ ছাত্ৰী কঢ়িয়াই লৈ আহিছিল ৷ ছাত্ৰ ছাত্ৰীৰ দলটোৱে অৰুণাচলৰ নামচাইত অনুষ্ঠিত হৈ থকা ফুটবল খেল প্ৰতিযোগিতাত অংশগ্ৰহণ কৰিবলৈ গৈ আছিল ৷
ঘটনাৰ বিৱৰণী অনুসৰি ছাত্ৰ ছাত্ৰী কঢ়িওৱা গাড়ীখনে লিডুৰ ফালৰ পৰা তীব্ৰ বেগেৰে আহি থকাৰ সময়তেই নিয়ন্ত্ৰণ হেৰুৱায় ৷ যাৰ ফলত ঘাইপথৰ ওপৰতে বাগৰি পৰে বাহনখন ৷ আনহাতে, আঘাতপ্ৰপ্ত ছাত্ৰ ছাত্ৰীসকলক স্থানীয় লোকসকলে জাগুন ক্ষুদ্ৰ স্বাস্থ্য কেন্দ্ৰলৈ লৈ যায় যদিও উন্নত চিকিৎসাৰ বাবে মাৰ্ঘেৰিটাৰ অসামৰিক চিকিৎসালয় লৈ প্ৰেৰণ কৰা হয় ৷
