ডুমডুমা, 3 জুন: তিনিচুকীয়া জিলাৰ ডুমডুমাত দুৰ্বৃত্তৰ চুৰিৰ আঘাটত এজন যুৱক গুৰুতৰভাৱে আহত হয় । আহত প্ৰায় 24 বছৰীয়া যুৱকজন ডুমডুমাৰ সমীপৱৰ্তী ৰজাগড়ৰ বিমান ফুকন বুলি জানিব পৰা গৈছে । ঘটনা অনুসৰি, পিতৃ-মাতৃহীন বিমান ফুকনে তিনিচুকীয়াৰ এখন হোটেলত কাম কৰি জীৱন নিৰ্বাহ কৰি আহিছে । অইন দিনাৰ দৰেই বুধবাৰেও বিমানে হোটেলৰ কাম সমাপ্ত কৰি তিনিচুকীয়াৰ পৰা বাছেৰে ঘৰলৈ ওভটে আৰু ডুমডুমাৰ উচামাটিত বাছখনৰ পৰা নামি ঘৰলৈ বুলি খোজ লয় ।
সেই সময়তে তিনিজন লোকৰ সৈতে তেওঁৰ মুখামুখি হয় । মদৰ ৰাগিত মাতাল লোক কেইজনৰ লগত সৰু কথাক লৈ বিমানৰ তৰ্ক-বিতৰ্ক হয় । ইমানতেই অতিষ্ঠ হৈ লোককেইজনৰ এজনে বিমানক মাৰধৰ কৰাৰ ওপৰি চুৰিৰে ডিঙিত আঘাট হানে । উপৰ্যুপৰি কৰা আঘাটত মাটিত পৰি যোৱা যুৱকজনৰ গাত সুৰা ঢালি দি পুনৰ আঘাট কৰিবলৈ লওতেই সেই পথেদি গৈ থকা পথচাৰীৰ চকুত পৰে এই ঘটনা । পথাচাৰীৰ সক্ৰিয়তাত কথমপি ৰক্ষা পৰে যুৱকজন ৷
ইফালে, এই ঘটনাৰ সম্ভেদ পাই ঘটনাস্থলীত উপস্থিত হৈ আৰক্ষীয়ে বিমানক উদ্ধাৰ কৰি ডুমডুমা এফআৰইউলৈ লৈ যায় । পৰৱৰ্তী সময়ত প্ৰাথমিক চিকিৎসা প্ৰদান কৰাৰ পিছত সম্প্ৰতি বিমানৰ স্বাস্থ্যৰ অৱস্থা সুস্থিৰ হোৱা বুলি জানিব পৰা গৈছে ।
আনহাতে, ঘটনা সংক্ৰান্তত এটা গোচৰ ৰজু কৰি আৰক্ষীয়ে সম্প্ৰতি দুৰ্বৃত্তকেইটাক বিচাৰি অভিযান আৰম্ভ কৰিছে । আঘাটপ্ৰাপ্ত বিমানে সংবাদ মাধ্যমক জনোৱা মতে, চুৰিৰে আঘাট কৰা দুৰ্বৃত্তৰ দলটোৰ এজনে পূৰ্বেও বিমানক বেয়াকৈ মাৰ-ধৰ কৰাৰ ঘটনা সংঘটিত হোৱা বুলি জানিব পৰা গৈছে ।
লগতে পঢ়ক: ক’ভিড পৰিস্থিতিত কেনে আছে গোলাঘাট-কাৰ্বি আংলং সীমান্তৱৰ্তী অঞ্চলবাসী ?
