ধুবুৰী, 13 মে' : দক্ষিণ শালমাৰা জিলাৰ হাটশিঙিমাৰীৰ খাৰুৱাবান্ধাত বুধবাৰে এটা কালভাৰ্ট নিৰ্মাণৰ কামক লৈ এক উত্তেজনাপূৰ্ণ পৰিস্থিতিৰ সৃষ্টি হয় । নিৰ্মাণ কাৰ্যত অনিয়ম সংঘটিত হোৱাৰ বাবে ৰাইজে নিৰ্মাণৰ কাম বন্ধ কৰি দিয়াৰ ফলত সৃষ্টি হয় এই উত্তেজনাপূৰ্ণ পৰিস্থিতিৰ ৷
উল্লেখযোগ্য যে, 2018-19 বিত্তীয় বৰ্ষৰ BADP(SCA) আঁচনিৰ অধীনত খাৰুৱাবান্ধাৰ তেতুল তলাত ৰাস্তা সহ এটা কালভাৰ্ট নিৰ্মাণৰ বাবদ চৰকাৰে আবন্টন দিছিল প্ৰায় 30 লাখ টকা । আৰু উক্ত কামৰ ঠিকা লাভ কৰিছিল মানকাচৰ সমষ্টিৰ বিধায়ক ডা৹ মতিউৰ ৰহমান মণ্ডলৰ পুত্ৰ মহিবুৰ ৰহমান মণ্ডলে ৷
কিন্তু ৰাইজৰ অভিযোগ অনুসৰি, ঠিকাদাৰ মহিবুৰ ৰহমান মণ্ডলৰ মইমতালিত নিম্নমানৰ সামগ্ৰীৰে কামটো চলি থকাৰ বাবে স্থানীয় ৰাইজে ক্ষোভিত হৈ বুধবাৰে কামটো বন্ধ কৰি দিয়ে ।
আনহাতে, উক্ত নিৰ্মাণ কাৰ্যৰ উচ্চ পৰ্যায়ৰ তদন্তৰ জৰিয়তে উন্নত মানদণ্ডৰ সামগ্ৰীৰে নিৰ্মাণ কাৰ্য সম্পূৰ্ণ কৰিবলৈ সংশ্লিষ্ট বিভাগটোৰ বিষয়া কৰ্মচাৰীৰ লগতে প্ৰশাসন তথা চৰকাৰক দাবী জনাইছে স্থানীয় ৰাইজে ৷
লগতে পঢ়ক : চাকৰি হেৰুৱালে দেশৰ ২.৭ কোটি যুৱপ্ৰজন্মই !
