তেজপুৰ, 3 আগষ্ট : ৰাজ্যৰ অন্য জিলাৰ লগতে শোণিতপুৰত জিলাতো ব্যাপক হাৰত বৃদ্ধি পাই আহিছে ক'ভিড আক্ৰান্ত লোকৰ সংখ্যা ৷ বৰ্তমানলৈ জিলাখনত 1565 গৰাকী লোকৰ দেহত ধৰা পৰিছে ক'ভিড-19 পজিটিভ ৷
শেহতীয়াকৈ জিলাখনত আক্ৰান্ত লোকৰ সংখ্যাৰ প্ৰতি লক্ষ্য ৰাখি প্ৰশাসনে ৰেপিড এন্টিজেন টেষ্টৰ ব্যবস্থা কৰিছে ৷ স্বাস্থ্যমন্ত্ৰীৰ নিৰ্দেশনাৰ পিচতে জিলা উপায়ুক্ত মানবেন্দ্ৰ প্ৰতাপ সিঙৰ তৎপৰতাত স্বাস্থ্য বিভাগে এই পৰীক্ষা আৰম্ভ কৰিছে ৷
সোমবাৰৰ দিনটোত জিলাখনৰ সদৰ তেজপুৰত ৰেপিড এন্টিজেন টেষ্টত 78 গৰাকী লোকৰ ক'ভিড পজিটিভ পোৱা গৈছে ৷ আনহাতে, প্ৰতিদিনে 2000 লোকৰ ৰেপিড এন্টিজেন টেষ্ট কৰা হ'ব বুলিও উপায়ুক্ত গৰাকীয়ে জানিবলৈ দিয়ে ৷ লগতে, জিলাখনত নিতৌ বৃদ্ধি পোৱা আক্ৰান্তৰ সংখ্যাৰ প্ৰতি লক্ষ্য ৰাখি জিলাখনত আসনৰ সংখ্যা হ্ৰাস পোৱাত অন্য ক'ভিড চেন্টাৰলৈ ৰোগীক প্ৰেৰণ কৰা হৈছে বুলি উপায়ুক্ত গৰাকীয়ে প্ৰকাশ কৰে ৷
উল্লেখ্য যে, 2 আগষ্টত স্বাস্থ্য়মন্ত্ৰী হিমন্ত বিশ্ব শৰ্মাৰ টুইট অনুসৰি, অসমত সৰ্বমুঠ ক'ভিড আক্ৰান্ত লোকৰ সংখ্যা 42904 গৰাকী ৷ সুস্থ হোৱা ৰোগীৰ সংখ্যা 32384 গৰাকী ৷ চিকিৎসাধীন ৰোগীৰ সংখ্যা 10412 গৰাকী আৰু মৃত্য়ু হোৱা ৰোগীৰ সংখ্য়া 105 গৰাকী ৷
লগতে পঢ়ক : নতুন শিক্ষানীতিৰ জৰিয়তে শিক্ষা ব্যৱস্থা সলনিৰ সম্ভাৱনা
