ৰঙাপৰা , 4 জুন : শোণিতপুৰ জিলাৰ ৰঙাপৰাত দিনক দিনে বৃদ্ধি পাইছে যান-জঁটৰ সমস্যা। একাংশ ব্যৱসায়ীয়ে গড়কাপ্তানী পথৰ ওপৰত সামগ্ৰী ৰাখি বিক্ৰী কৰাৰ ফলত সৃষ্টি হৈছে যান-জঁট ৷
ৰঙাপৰাৰ ব্যৱসায়ীসকলে নিজৰ ব্যৱসায় প্ৰতিষ্ঠানৰ সন্মুখত তথা মিছামাৰী-ৰঙাপৰা-বালিপৰা সংযোগী গড়কাপ্তানী পথৰ ওপৰত অবৈধভাৱে সামগ্ৰীবোৰ ৰাখি বিক্ৰী কৰি অহাৰ ফলত নগৰখনত যান-জঁটৰ সমস্যা ক্ৰমাৎ বৃদ্ধি পাইছে। ৰঙাপৰাত একাংশ ব্যৱসায়ীয়ে অবৈধভাৱে ৰাখি সামগ্ৰী বিক্ৰী কৰি অহাৰ পাচতো পৌৰসভা আৰু জিলা প্ৰশাসনে আজিলৈকে কোনো ধৰণৰ ব্যৱস্থা গ্ৰহণ নকাৰৰ অভিযোগ উত্থাপিত হৈছে। তাৰোপৰি গড়কাপ্তানী পথচোৱাৰ কাষতে জধে-মধে গাড়ী, মটৰ চাইকেল, ই-ৰিক্সা, ঠেলা আদি ৰখোৱাৰ ফলত তীব্ৰ যান জঁটৰ সৃষ্টি হৈ আহিছে।
ইয়াৰোপৰি নগৰখনৰ দুয়োকাষে থকা পদ পথটিৰ ওপৰত একাংশ ব্যৱসায়ীয়ে নানা সামগ্ৰী ৰাখি বিক্ৰী কৰি অহাত পদ পথটিৰে ৰাইজে খোজ কাঢ়ি অহা-যোৱা কৰাৰ সময়ত দুৰ্ভোগ ভূগিবলগীয়া হৈছে। সেয়েহে ৰঙাপৰা নগৰখনত গড়কাপ্তানী পথৰ ওপৰত থকা বিক্ৰীজাত সামগ্ৰী সমূহ উচ্ছেদ কৰি উদ্ভৱ হোৱা যান-জঁটৰ সমস্যাটি সমাধান কৰিবলৈ পৌৰসভা আৰু জিলা প্ৰশাসনক স্থানীয় ৰাইজে দাবী জনাইছে।
