ৰঙাপাৰা, 16 ফেব্ৰুৱাৰী : স্বৰস্বতী পূজাৰ আনন্দ-উল্লাসৰ মাজতে শোণিতপুৰৰ ৰঙাপৰাত সংঘটিত হয় এক ভয়াবহ পথ দুৰ্ঘটনা । দুৰ্ঘটনাত এজন যুৱক থিতাতে নিহত হোৱাৰ লগতে গুৰুতৰভাৱে আহত হয় আন দুজন ব্যক্তি । শোণিতপুৰৰ ৰঙাপৰা-বালিপৰা সংযোগী পথৰ হাতীবাৰী চাহ বাগিচাৰ নেকেৰাহোলাত ৰঙাপৰা অভিমুখী এখন এ এছ ১২ ইউ ৭৯৪২ নম্বৰৰ গেলেমাৰ মটৰ চাইকেল এ এছ ২৭ চি ৬৮১৫ নম্বৰৰ ৰৈ থকা ডাম্পাৰখনৰ পাছফালে তীব্ৰ গতিত খুন্দা মাৰে ।
এই ঘটনাত মটৰ চাইকেলখনৰ তিনিজন আৰোহীৰ এজনৰ থিতাতে মৃত্যু হয় । নিহত লোকজন ৰঙাপৰা ১ নং ৱাৰ্ডৰ নিৱাসী দিপাংকৰ দাস বুলি জানিব পৰা হৈছে ৷ আনহাতে দুৰ্ঘটনাত আন দুজন আৰোহী চনু গোস্বামী আৰু ৰজত আৰ্চাজী গুৰুতৰভাৱে আহত হৈছে । ঘটনাস্থলীত ৰঙাপৰা আৰক্ষী উপস্থিত হৈ ঘটনাৰ বুজ লোৱাৰ লগতে আহত দুয়োজনকে উন্নত চিকিৎসাৰ বাবে তেজপুৰ চিকিৎসা মহাবিদ্যালয়লৈ প্ৰেৰণ কৰিছে ।
লগতে পঢ়ক : সাপেখাতীত নৱ বিৱাহিতা বোৱাৰীৰ ৰহস্যজনক মৃত্যু
