ৰঙাপাৰা,3 নৱেম্বৰ: সোনাই-ৰূপাই অভয়াৰণ্য আৰু নামেৰী ৰাষ্ট্ৰীয় উদ্যানৰ পৰা খাদ্যৰ সন্ধানত ওলাই অহা জাক জাক বনৰীয়া হাতীয়ে উপদ্ৰৱ চলাই আহিছে জনাঞ্চলত । শোণিতপুৰৰ ৰঙাপৰাত বনৰীয়া হাতীয়ে অহৰহ তাণ্ডৱ চলাই অহাত কৃষক ৰাইজ এতিয়া বিপদত পৰিছে। বিঘাই বিঘাই ধাননি পথাৰ বিনষ্ট কৰিছে বনৰীয়া হাতীৰ বৃহৎ জাকে ।বনৰীয়া হাতীৰ জাকটো কেইবাটাও ভাগত বিভক্ত হোৱাৰ ফলত নিয়ন্ত্ৰণ কৰাটোও বন বিভাগে বাবে তীব্ৰ প্ৰত্যাহ্বান ৰূপে থিয় দিছে ৷
ৰঙাপাৰাত বনৰীয়া হাতীৰ তাণ্ডৱ : তহিলং ধাননি পথাৰ ইফালে, বিঘাই বিঘাই পথাৰৰ পকা ধান হাতীয়ে তহিলং কৰাৰ ফলত কৃষক ৰাইজ যথেষ্ট চিন্তিত হৈ পৰিছে ৷ লগতে বনৰীয়া হাতীৰ বাবে নিশা উজাগৰী কটাবলগীয়া হৈছে দৰিদ্ৰ কৃষক ৰাইজে । কিয়নো সন্ধিয়া লগে লগে বনৰীয়া হাতীৰ এটা বৃহৎ জাকে ৰঙাপৰাৰ বিভিন্ন ঠাইৰ ধাননি পথাৰত প্ৰৱেশ কৰি ধান খাই-গচকি তহিলং কৰাৰ লগতে জনবসতিপূৰ্ণ অঞ্চললৈ প্ৰৱেশ কৰি সন্ত্ৰাস সৃষ্টি কৰি আহিছে । আনকি বনৰীয়া হাতীৰ উপদ্ৰৱৰ বাবে এই বছৰটোত খেতি কৰাৰ পৰাই বিৰত থাকিল ৰঙাপৰাৰ একাংশ কৃষক ৰাইজে । বৰ্তমান বনৰীয়া হাতীৰ বৃহৎ জাকটো পুনৰ বনাঞ্চলৈ খেদি পঠোৱাৰ ক্ষেত্ৰত সম্পূৰ্ণ বন বিভাগ ব্যৰ্থ হোৱাৰ অভিযোগ তুলিছে ৰাইজে ।
