ৰঙাপৰা, 18 জুন: অসমত কোভিড-১৯ত আক্ৰান্তৰ সংখ্যা ক্ৰমান্বয়ে বৃদ্ধি পাবলৈ ধৰাত চুবুৰীয়া ৰাজ্য অৰুণাচল প্ৰদেশত নিৰাপত্তাহীনতাত ভুগিব লগীয়া হৈছে অসমৰ ট্ৰাক চালকসকলে ৷ যাৰবাবে বিগত 6 দিন ধৰি শোণিতপুৰৰ মিছামাৰীত আবদ্ধ হৈ আছে অৰুণাচল প্ৰদেশলৈ পেট্ৰেলিয়ামজাত সামগ্ৰী সৰবৰাহ কৰা সকলো টেংকাৰ ৷ চৰম নিৰাপত্তাহীনতাত ভুগি বিগত 12 জুনৰ পৰা ৰাজ্যখনলৈ পেট্ৰলজাত সামগ্ৰী নিয়া বন্ধ কৰি ৰাখিছে টেংকাৰ চালকসকলে ৷ উল্লেখ্য যে, অৰুণাচললৈ তেল কঢ়িয়াই নিয়া গাড়ী সমূহৰ চালক আৰু হেণ্ডিমেন সকলক কোভিড-19 ৰোগ বিয়পোৱাৰ সন্দেহ প্ৰকাশ কৰি নানান ধৰণে হাৰাশাস্তি কৰি আহিছে স্থানীয় ৰাইজে ।
অভিযোগ অনুসৰি চালক-হেণ্ডিমেন সকলক অৰুণাচল প্ৰদেশৰ জনজাতীয় লোকসকলে টেংকাৰ গাড়ী পথত ৰখাবলৈ নিদিয়াৰ লগতে পথৰ দাঁতিত ভাত ৰান্ধিবলৈ নিদিয়ে ৷ গাড়ীৰ চকা ফুটাৰ পিছতো ৰখাবলৈ নিদিয়াৰ ওপৰিও বাচন-বৰ্তনত গোৰ মাৰি দিয়াৰ লগতে গাড়ী ৰখালে পাঁচ হাজাৰ টকা জৰিমনা বিহাৰ ভাবুকি প্ৰদান কৰি আহিছে । ঘটনাৰ সন্দৰ্ভত চালকসকলে অৰুণাচল প্ৰদেশৰ প্ৰশাসনক অভিযোগ দাখিল কৰি আহিছে যদিও কোনো ধৰণৰ পদক্ষেপ গ্ৰহণ কৰা নাই ৰাজ্যখনৰ প্ৰশাসনে ৷ সেয়েহে টেংকাৰ গাড়ীৰ চালক-হেণ্ডিমেন সকলৰ নিৰাপত্তা সুনিশ্চিত নোহোৱা পৰ্যন্ত অসম পেট্ৰেলিয়াম মজদুৰ ইউনিয়নৰ মিছামাৰী শাখাই গাড়ী সমূহৰ চলাচল বন্ধ কৰি ৰখাৰ সিদ্ধান্ত গ্ৰহণ কৰিছে ৷
