তেজপুৰ,৩১ ডিচেম্বৰ : ক'ভিড ১৯ৰ ভয়াবহতাৰ পাচত কাজিৰঙা ৰাষ্ট্ৰীয় উদ্যানলৈ আহিছে সু-খবৰ । ভয়াবহ বানৰ মাজতে কৰ'ণাৰ সতৰ্কতাৰে অক্টোবৰ মাহৰ ২১ তাৰিখে কাজিৰঙা ৰাষ্ট্ৰীয় উদ্যানখন দৰ্শকৰ বাবে মুকলি কৰা হৈছিল ৷ উক্ত দিনৰে পৰা আজিৰ দিনটোলৈকে ৰাষ্ট্ৰীয় উদ্যান খনত দেশী-বিদেশী ৬৪,১০০ জন পৰ্যটকৰ আগমন ঘটে ৷ ইয়াৰ ভিতৰত ১৫০ জন আছিল বিদেশী পৰ্যটক ।
এই মহামাৰীৰ মাজতে ৰাষ্ট্ৰীয় উদ্যানৰ কৰ্তৃপক্ষই পৰ্যটকৰ পৰা ১২৭.৩২ লাখ ৰাজহ সংগ্ৰহ কৰিবলৈ সক্ষম হয় বুলি জনাইছে ৰাষ্ট্ৰীয় উদ্যানৰ সঞ্চালক পি শিৱ কুমাৰে । তেওঁ কয় যে, এই বছৰটোত ৰাষ্ট্ৰীয় উদ্যান খনত নতুনকৈ সংযোজিত হয় সপ্তম,অষ্টম আৰু নৱম খণ্ড ৷ এই কেইটা হৈছে বিশ্বনাথ, ভোমোৰাগুৰি আৰু চিৰাং ৷ য'ত পৰ্যটক সকলে পৰ্বতাৰোহণৰো সুবিধা ল'ব পাৰিব ।
এই বছৰটোত ৰাষ্ট্ৰীয় উদ্যান খনত মাত্ৰ ২টা গঁড় চোৰাং চিকাৰীৰ হাতত নিহত হয় বুলি জানিব পৰা গৈছে ৷ ৰাষ্ট্ৰীয় উদ্যানখনৰ অন্তৰ্গত ৬৬ টা গোচৰ গঁড় হত্যাৰ সংক্ৰান্তীয়, ইয়াৰে ১৭টা গঁড় চিকাৰৰ । আনহাতে, উদ্যানখনৰ পৰা ৯৫ জন লোক আটক কৰা হয় ৷ ইয়াৰ ভিতৰত ৩৮ জন গঁড় চিকাৰৰ লগত জড়িত । ৰাষ্ট্ৰীয় উদ্যানখনৰ সৈতে নতুনকৈ ভোমোৰাগুৰি, পানপুৰ, চিৰাং আৰু বিশ্বনাথ ঘাট সংযোজিত কৰা হয় । ইয়াৰে ব্ৰহ্মপুত্ৰৰ বুকুত নৌকা বিহাৰ আৰু ৰাফটিং এক অন্যতম ৷
অন্য এক খবৰৰ বাবে:ব্ৰহ্মপুত্ৰৰ বুকুত ২০২০ বৰ্ষৰ অন্তিম সূৰ্যাস্ত
