তেজপুৰ,২৩ ছেপ্টেম্বৰ: বৰ্তমান সময়ত নাৰী সুৰক্ষাৰ দিশটো আটাইতকৈ অৱহেলিত বুলি প্ৰায়েই প্ৰমাণিত হৈ আহিছে ৷ এইবাৰ তেজপুৰত সভ্য সমাজক লজ্জানত কৰা এক ঘটনা সংঘটিত হোৱাৰ কথা পোহৰলৈ আহিছে ।
বৃদ্ধ নামঘৰীয়াৰ বিৰুদ্ধে ১৬ বছৰীয়া কিশোৰীক ধৰ্ষণৰ অভিযোগ । তেজপুৰ পিঠাখোৱাত সংঘটিত হৈছে এই লাজলগা ঘটনা । পিঠাখোৱাৰ কেশৱ নাথ নামঘৰীয়াৰ বিৰুদ্ধে উত্থাপন হৈছে এগৰাকী ১৬ বছৰীয়া কিশোৰী ধৰ্ষণৰ অভিযোগ । কিশোৰীগৰাকীয়ে নিজেই পৰিয়ালক এই বিষয়ে জনোৱাত সৃষ্টি হয় তীব্ৰ চাঞ্চল্যৰ । নামঘৰত ডবা কোবোৱা নামঘৰীয়াৰ পিঠিত ডবা বজালে ৰাইজে ।
পৰিয়ালৰ লোকে চিকিৎসালয়ত উপস্থিত হৈ ঘটনা সন্দৰ্ভত ৰাইজ আৰু আৰক্ষীক অৱগত কৰে । অভিযোগ অনুসৰি কেশৱ নাথ ওৰফে বুবুল নামৰ লোকজনে নানা প্ৰলোভন দি এগৰাকী ১৬ বছৰীয়া কিশোৰীক কেইবাদিনো ধৰি নিচাযুক্ত দ্ৰব্য খুৱাই অচেতন কৰি ধৰ্ষণ কৰি আহিছিল । প্ৰথমাৱস্থাত এই কথা কোনোৱে গম পোৱা নাছিল যদিও অৱশেষত বুবুলৰ এই কু-কাণ্ডৰ কথা শনিবাৰে পোহৰলৈ আহে । কিশোৰীগৰাকী আজি অন্তঃসত্বা হোৱা বুলি চিকিৎসকে নিশ্চিত কৰাৰ পিছতে হাহাকাৰ লাগে গাঁওখনত ।