ৰঙাপৰা, 12 মেঃ বিদ্যুতৰ লুকাভাকুত অতিষ্ঠ হৈ পৰিছে শোণিতপুৰৰ মিছামাৰীবাসী ৰাইজ ৷ দীৰ্ঘদিন ধৰি ঢিমিক-ঢামাক বিদ্যুৎ যোগানে জ্বলাকলা খোৱাইছে ৰাইজক ৷
উল্লেখযোগ্য যে মিছামাৰী অঞ্চলত ৬০-৭০ খন গাঁৱৰ উপৰি ভাৰতীয় সেনাৰ এটা বৃহৎ সামৰিক সামৰিক ঘাটি আছে । ৰঙাপৰা বিদ্যুৎ উপ-সংমণ্ডলৰ অধীনস্থ এই বৃহত্তৰ মিছামাৰী অঞ্চলটোৰ সামৰিক-অসামৰিক লোকক তেজপুৰৰ ডিপুটা অঞ্চলৰ পৰা বিদ্যুত যোগান ধৰি আহিছে ৷ তেজপুৰৰ ডিপুটাৰ পৰা অঞ্চলটোৰ অসামৰিক লোকৰ বাবে পৃথকে বিদ্যুত যোগান ধৰা খুঁটা, তাঁৰ আদি বতাহ-বৰষুণত সঘনাই ব্যাহত হোৱাৰ ফলত বিদ্যুত বিভাগে সামৰিক ঘাটিলৈ যোগান ধৰা খুঁটাত তাঁৰ সংযোগ কৰি সাধাৰণ জনতাক বিদ্যুত যোগান ধৰাৰ ব্যৱস্থা কৰিছে ৷ পৰিতাপৰ বিষয় যে ইয়াৰ পাছতো অঞ্চলটোৰ ৰাইজে নিয়মীয়াকৈ বিদ্যুত লাভ কৰিবলৈ সক্ষম হোৱা নাই । বিয়াগোম বিভাগটোৱে বৃহত্তৰ অঞ্চলটোত বিদ্যুত সেৱা চোৱাচিতাৰ বাবে কেৱল মাত্ৰ এজনেই কৰ্মচাৰী নিয়োগ কৰি ৰাখিছে । এগৰাকী কৰ্মচাৰীয়েই সামৰিক-অসামৰিক সকলো দিশ চাবলগীয়া হয় । যোৱা এপ্ৰিল মাহৰ দ্বিতীয় সপ্তাহ মানৰ পৰাই বৃহত্তৰ অঞ্চলটোত বিদ্যুৎ সেৱা অনিয়মীয়া হৈ থকাৰ ফলত কল-কাৰখানা, ছাত্ৰ-ছাত্ৰী সকলৰ পঢ়াশুনা আদিৰ উপৰি সংবাদ কৰ্মী সকলে বাতৰি পৰিবেশন কৰাত ব্যাপক ব্যাঘাতৰ সৃষ্টি হৈছে ৷
