তেজপুৰ, ৪ জানুৱাৰী : ভাৰত-চীন সীমান্তত দ্ৰুতগতিত এক সবল পথ আন্তঃগাঁথনি নিৰ্মাণ কৰাত ভাৰত চৰকাৰে সৰ্বোচ্চ অগ্ৰাধিকাৰ প্ৰদান কৰি আহিছে । তাৰেই প্ৰতিফলন ঘটাই সীমান্ত পথ সংস্থা চমুকৈ বিআৰঅ'ৱে শূন্য ডিগ্ৰীৰো তলৰ তাপমাত্ৰাত অতি প্ৰত্যাহ্বান নেওচি আধুনিক প্ৰযুক্তিৰে অৰুণাচলৰ ভাৰত-চীন সীমান্তত এটা বিটুমিনৰ পথ নিৰ্মাণ কৰি উলিয়াইছে । উল্লেখ্য যে শূন্য ডিগ্ৰীৰো তলৰ তাপমাত্ৰাৰ পৰিস্থিতিত চীন সীমান্তত অতি উচ্চতাত বিটুমিনৰ পথ নিৰ্মাণ আৰু ৰক্ষণাবেক্ষণ কৰাটো ভাৰতৰ মুখ্য পথ নিৰ্মাণ সংস্থা বিআৰঅ'ৰ বাবে সদায় এক প্ৰত্যাহ্বানমূলক কাম হৈ আহিছে ।
বিশেষকৈ শীতকাল আৰম্ভ হোৱাৰ লগে লগে বেছিভাগ বিটুমিন পথ নিৰ্মাণকাৰ্য বন্ধ হৈ যায় বা পলম হয় । কিয়নো এই পথ নিৰ্মাণৰ বাবে গৰম বিটুমিন মিশ্ৰণ উৎপাদনৰ বাবে উচ্চ তাপমাত্ৰা অৰ্থাৎ 1160-170 0 চিন হট মিক্স প্ৰকল্পত গৰম কৰাৰ বাবে অতি বেছি সময়ৰ প্ৰয়োজন হয় । ইয়াৰ উপৰি লাভ কৰিব বিচৰা স্থিতিস্থাপকতা আৰু সফলতা অৰ্জনৰ বাবে কাৰ্যকৰী সংকোচনৰ বাবে পেভিং স্থানত বিটুমিন মিশ্ৰণ স্থাপন আৰু সংহত কৰিব লাগে । যিটো একপ্ৰকাৰ দুৰূহ হৈ পৰে ।
হট মিক্স প্ৰকল্পৰ পৰা প্ৰকল্প স্থানলৈ বিটুমিন মিশ্ৰণ শূন্য ডিগ্ৰী তাপমাত্ৰাৰ তলত পাহাৰৰ ৰাস্তাবোৰত পৰিবহণৰ বাবে সময় বেছি লাগে । যাৰ ফলত পেভিং স্থান গৈ পোৱাৰ পূৰ্বে বিটুমিন মিশ্ৰণ দ্ৰুতভাৱে ঠাণ্ডা হয় । এনেধৰণৰ মিশ্ৰণ পেভিং আৰু ৰোলিঙৰ বাবে নিম্নমানৰ হয় ।
কিন্তু এই সকলো প্ৰত্যাহ্বানৰ মোকাবিলা কৰিবলৈ সীমান্ত পথ সংস্থাই ভৰ্টক প্ৰকল্পৰ অধীনত অৰুণাচল প্ৰদেশত ভাৰতৰ আটাইতকৈ পুৰণি আৰু মুখ্য পথ গৱেষণা সংস্থা চিএছআইআৰ-চেণ্ট্ৰেল ৰোড ৰিছাৰ্চ ইনষ্টিটিউট (চিএছআইআৰ-চিআৰআৰআই), বিজ্ঞান আৰু প্ৰযুক্তি মন্ত্ৰালয়ৰ দ্বাৰা বিকশিত এক থলুৱা পথ নিৰ্মাণ প্ৰযুক্তি 'ৰেজুপেভ' (REJUPAVE) সফলতাৰে ব্যৱহাৰ কৰি শূন্য ডিগ্ৰী তাপমাত্ৰাৰ তলৰ উষ্ণতাৰ পৰিস্থিতিত এই বিটুমিন পথ নিৰ্মাণ কৰে ।
এই প্ৰযুক্তিটো শেহতীয়াকৈ বিআৰঅ'ৱে অৰুণাচলৰ চীন সীমান্তৰ ওচৰৰ বিশ্বৰ সৰ্বোচ্চ চেলা ৰোড টানেল আৰু এলজিজি-ডামটেং-য়াংষ্টে (এলডিৱাই ৰোড) পথ শাখাত বিটুমিন পথ নিৰ্মাণৰ বাবে সফলতাৰে ৰূপায়ণ কৰা হৈছে ।
লগতে পঢ়ক :দেৰগাঁৱৰ পথ দুৰ্ঘটনাত নিহতৰ পৰিয়ালৰ গৃহত স্বাস্থ্য মন্ত্ৰী কেশৱ মহন্ত
