ৰঙাপৰা,২৯ ডিচেম্বৰ : ইংৰাজী নৱবৰ্ষলৈ মাজত মাত্ৰ কেইটামান দিন বাকী । সকলোতে চলিছে নৱবৰ্ষক আদৰাৰ প্ৰস্তুতি । কিন্তু এই আনন্দ উল্লাহৰ মাজতে পুনৰ চাহ শ্ৰমিকসকল নামিছ প্ৰতিবাদত । বকেয়া ধন আদায় দিয়াৰ দাবীত এইবাৰ শোণিতপুৰ জিলাৰ ৰঙাপৰাৰ ধূলাপাদুং চাহ বাগিছাত তীব্ৰ প্ৰতিবাদ সাব্যস্ত কৰে অখিল ভাৰতীয় চাহ মজদুৰ সংঘই (ABCMS stages protest at Sonitpur) ।
বুধবাৰে বাগিছাখনৰ জেনেৰেল মেনেজাৰৰ কাৰ্যালয়ৰ সন্মুখত সংঘই প্ৰতিবাদ সাব্যস্ত কৰে । চাহ শ্ৰমিকসকলক বৰ্ধিত মজুৰিৰ বকেয়া ধন অতিশীঘ্ৰে আদায় দিবলৈ দাবী জনায় প্ৰতিবাদকাৰীসকলে । চৰকাৰ তথা বিভাগীয় কতৃপক্ষৰ বিৰুদ্ধে বিভিন্ন শ্ল'গানেৰে পৰিৱেশ উত্তাল কৰি তোলে প্ৰতিবাদকাৰীসকলে । আনহাতে অতি শীঘ্ৰে তেওঁলোকৰ দাবী পূৰণ নহ'লে ভয়ংকৰ আন্দোলনৰ হুংকাৰ দিয়ে প্ৰতিবাদকাৰীয়ে ।
উল্লেখ্য যে যোৱা ১০ জুলাইত বৰ্ধিত মজুৰিৰ বকেয়া ধন দুটা কিস্তিত শ্ৰমিক ৰাইজক দিয়াৰ ক্ষেত্ৰত অসম চাহ মজদুৰ সংঘ আৰু চাহ বাগিছাৰ মালিকপক্ষৰ সৈতে এক চুক্তি স্বাক্ষৰ হৈছিল । সেই অনুসৰি চাহ বাগিছাৰ মালিকসকলে জুলাই-আগষ্ট মাহত শ্ৰমিক ৰাইজক প্ৰথম কিস্তিৰ ধন আদায় দিলে যদিও এপিজে টি লিমিটেডে (Apeejay tea limited) চুক্তি অনুসৰি আজিলৈকে শ্ৰমিকক দ্বিতীয় কিস্তিৰ ধন আদায় নিদিলে ।
বৰদিনৰ প্ৰাকক্ষণত দ্বিতীয় কিস্তিৰ ধন এপিজে টি লিমিটেডে দিবলৈ সক্ষম নহ'ল । সেয়েহে অখিল ভাৰতীয় চাহ মজদুৰ সংঘই চাহ শ্ৰমিকৰ প্ৰাপ্য ধন আদায়ৰ দাবীত বিক্ষোভ কাৰ্যসূচী ৰূপায়ণ কৰে । উল্লেখ্য যে ৰাজ্যখনত থকা এপিজে টি লিমিটেডৰ ১৭ খন চাহ বাগিছাৰ মালিকপক্ষই এতিয়ালৈ চাহ শ্ৰমিকক বৰ্ধিত মজুৰিৰ বকেয়া ধনৰ দ্বিতীয় কিস্তি আদায় দিয়া নাই ।
লগতে পঢ়ক:Protest against NPS : নতুন পেঞ্চন নীতি বাতিলৰ দাবীত ৰাজ্যজুৰি প্ৰতিবাদ
