শিৱসাগৰ, 18 ডিচেম্বৰ: চলিত বৰ্ষৰ 22 ডিচেম্বৰত অৰুণাচল প্ৰদেশত পঞ্চায়ত নিৰ্বাচন অনুষ্ঠিত হ'ব ৷ সমাগত পঞ্চায়ত নিৰ্বাচনৰ বাবে প্ৰত্যেক ৰাজনৈতিক দলৰ কুচকাৱাজ ইতিমধ্যে তুংগত উঠাৰ পৰিৱৰ্তে অৰুণাচল প্ৰদেশৰ লংডিং জিলাৰ খাকাম ব্লকৰ অন্তৰ্গত পাঁচখনকৈ গাঁৱৰ প্ৰায় 7000 লোকে ভোট বৰ্জন কৰাৰ সিদ্ধান্ত গ্ৰহণ কৰিছে ৷ No Road No Vote শ্ল'গানেৰে খাকাম ব্লকৰ অন্তৰ্গত পাঁচখনকৈ গাওঁ ক্ৰমে কামহুৱা নকনু,কামহুৱা নকচা, খুচা , ভটনু, জগাও গাঁৱৰ ৰাইজে আগন্তুক অৰুণাচল প্ৰদেশৰ পঞ্চায়ত নিৰ্বাচনত তেওঁলোকৰ ভোটাধিকাৰ সাব্যস্ত নকৰাৰ সিদ্ধান্ত গ্ৰহণ কৰিছে ৷
ৰাইজৰ অভিযোগ অনুসৰি ইতিমধ্যে বহুকেইটা নিৰ্বাচন তেওঁলোকে পাৰ কৰি জনপ্ৰতিনিধিও নিৰ্বাচন কৰাৰ পাছতো ভাৰত ম্যানমাৰ সীমান্তত বসবাস কৰা অৰুণাচলী লোকসকলে আদিম যুগৰ মানুহৰ দৰে বসবাস কৰি আহিব লগীয়া হৈছে ৷ অভিযোগ অনুসৰি উল্লেখিত খাকাম ব্লকৰ অন্তৰ্গত পাঁচখন গাঁৱৰ পাঁচটা পথৰ লগতে মূল এম কে পথৰ দুৰৱস্থাই ৰাইজক যাতায়ৰ ক্ষেত্ৰত যথেষ্ট জীয়াতু ভুগাই আহিছে ৷
চৰকাৰ তথা জন প্ৰতিনিধিৰ গুৰুত্বহীনতাত কোনো উপায় বিচাৰি নাপাই এতিয়া এই গাঁও কেইখনৰ ৰাইজে ভোট বৰ্জনৰ সিদ্ধান্ত গ্ৰহণ কৰিছে ৷ ভাৰত ম্যানমাৰ সীমান্তলৈ সোণাৰি সমষ্টিৰ কেইগৰাকীমান সাংবাদিকক মাতি নি সদৌ খাকাম ছাত্ৰ সন্থাই এই কথা জানিবলৈ দিয়ে ৷
পঞ্চায়ত নিৰ্বাচন বৰ্জনৰ হুংকাৰ প্ৰদান কৰি খাকাম ছাত্ৰ সন্থাৰ প্ৰতিনিধিবৰ্গই জানিবলৈ দিয়ে যে সমষ্টিতোত 25 টাকৈ বছৰ এগৰাকী ব্যক্তিয়েই শাসন কৰি অহাৰ পাছতো ৰাইজে আজিকোপতি উন্নয়নৰ মুখ নেদেখিলে ৷ সেয়ে খাকাম ছাত্ৰ সন্থাই আগন্তুক নিৰ্বাচনৰ পূৰ্বে পথসমূহ মেৰামতিৰ বাবে সঠিক ব্যৱস্থা গ্ৰহণ নকৰিলে পাঁচখন গাঁৱৰ 7000 ভোটাৰে ভোট বৰ্জন কৰাৰ হুংকাৰ প্ৰদান কৰে ৷
লগতে পঢ়ক: ৰঙিয়াত পকী দলং নিৰ্মাণত অনিয়ম, তিনি বছৰে সম্পূৰ্ণ নহ'ল পকী দলং
