আমগুৰি, 22 নৱেম্বৰঃ জয়ন্ত তালুকদাৰ,গহেলা বড়ো আদিৰ দৰে প্ৰসিদ্ধ ধনুৰ্বিদে ৰাষ্ট্ৰীয় পৰ্যায়ত অসম মাতৃৰ নাম উজলাই তোলাৰ সময়তেই শিৱসাগৰৰ দুই ভাতৃয়েও আৰ্চাৰীৰ জৰিয়তে লাভ কৰিছে সমাদৰ ৷ শিৱসাগৰৰ আইলামুখৰ নিৱাসী বুদ্ধেশ্বৰ হাজৰিকাৰ দুই পুত্ৰ ৰাজীৱ হাজৰিকা আৰু ৰাণা হাজৰিকাই ভাৰতবৰ্ষৰ বিভিন্ন ৰাজ্যলৈ যোগান ধৰি আহিছে আৰ্চাৰী খেলৰ বাবে প্ৰয়োজনীয় ব্যয়বহুল ধনু ৷ ভাৰতবৰ্ষৰ অধিকাংশ ৰাজ্যলৈ আৰ্চাৰী খেলৰ ধনু যোগান ধৰি চৰ্চাৰ লগতে সমাদৰ লাভ কৰিছে দুয়োগৰাকী ভাতৃয়ে ৷
উল্লেখ্য যে, ২০১৩ চনতে ৰাজীৱ হাজৰিকাই প্ৰতিষ্ঠা কৰিছিল আৰ্চাৰী খেলৰ ধনু নিৰ্মাণ কৰা এই কাৰখানাটো ৷ উজনি অসমৰ একমাত্ৰ আৰ্চাৰীৰ প্ৰতিযোগিতাৰ বাবে ধনু বনোৱা কাৰখানা হিচাপে পৰিচিত এই কাৰখানাটোৰ পৰাই অন্ধ্ৰপ্ৰদেশ,উত্তৰপ্ৰদেশ,পঞ্জাৱ,চত্তীশগড়,ৰাজস্থান,হাৰিয়ানা,কেৰেলা,পুণে,দিল্লী, কলকাতা আদি ৰাজ্যলৈ নিয়া হয় ধনু ৷
আনহাতে, ধনু নিৰ্মাণৰ বাবে প্ৰয়োজন হয় জাতি বাঁহ,বনবগৰী কাঠ আদি ৷ আনহাতে কাড়ৰ বাবে প্ৰয়োজনীয় বাঁহ আমদানি কৰা হয় মণিপুৰ, শ্বিলঙৰ পৰা ৷ এই কাৰখানাটোত নিয়োজিত হৈ আছে অঞ্চলটোৰ চাৰিজনকৈ শিক্ষিত নিৱনুৱা যুৱক ৷ আৰ্চাৰীৰ ধনু নিৰ্মাণ কৰি নিজৰ লগতে চাৰিজনকৈ যুৱকৰ বাবে স্বাৱলম্বিতাৰ পথ প্ৰশস্ত কৰা আইলামুখৰ দুই ভ্ৰাতৃ নৱপ্ৰজন্মৰ বাবে হৈ পৰিছে আদৰ্শ ৷
