আমগুৰি, ৮ মাৰ্চ : আমগুৰিৰ অগপ-বিজেপিৰ মিত্ৰজোঁটৰ প্ৰাৰ্থী প্ৰদীপ হাজৰিকাই সোমবাৰে মনোনয়ন পত্ৰ দাখিল কৰে । আমগুৰি জালুকগাঁৱৰ নিজা বাসগৃহৰ পৰা হাজৰিকাই তিনি সহস্ৰাধিক সমৰ্থকসহ সমদল কৰি জিলা উপায়ুক্তৰ কাৰ্যালয়ত মনোনয়ন পত্ৰ প্ৰদান কৰে । উল্লেখ্য যে, আমগুৰিত বিজেপিয়ে বন্ধুত্বমূলক প্ৰাৰ্থী দাবী কৰা বিপৰীতে আজি সমদলত কেৱল বিজেপিৰ দুখনহে দলীয় পতাকা পৰিলক্ষিত হয় ।
অগপৰ প্ৰাৰ্থী প্ৰদীপ হাজৰিকাৰ বিৰুদ্ধে মুকলি বিদ্ৰোহ কৰা বিজেপি নেতা-কৰ্মীয়ে এই সমদলত অংশগ্ৰহণ কৰাৰ পৰা বিৰত থাকে । এনে দৃশ্যই অগপ-বিজেপিৰ মিত্ৰতাত বৃহৎ ফাঁট মেলা পৰিলক্ষিত হয় । আজি মনোনয়ন পত্ৰ দাখিলৰ সময়ত বিজেপিয়ে প্ৰদীপ হাজৰিকাক সহযোগ নকৰা আৰু সমগ্ৰ সমদলত কেৱল দুখনহে বিজেপিৰ দলীয় পতাকাৰ দৃশ্যই বিশেষ তাৎপৰ্য বহন কৰিছে । অগপ আৰু বিজেপিৰ এনে দৃশ্যৰ পিছত দুয়োটা দল একত্ৰিকৰণৰ ক্ষেত্ৰত কেনে পদক্ষেপ গ্ৰহণ কৰিব পৰৱৰ্তী সময়তহে লক্ষণীয় হ’ব ।
লগতে পঢ়ক : কলিয়াবৰত অগপ নেতা কেশৱ মহন্তৰ মনোনয়ন পত্ৰ দাখিল
