আমগুৰি, ২২ নৱেম্বৰ: ৰাজ্যত প্ৰতি বছৰে অহা বানৰ সমান্তৰালকৈ খহনীয়াৰ তাণ্ডৱত দিশহাৰা হৈ পৰে নৈপৰীয়া ৰাইজ ৷ বান আৰু খহনীয়াই প্ৰতি বছৰে জলাকলা খুৱাই অসমৰ নৈপৰীয়া লোকসকলক (Natural disaster in Assam) ৷ বাৰিষা নৈৰ বুকু উফন্দি উঠিলেই প্লাৱিত হয় নৈৰ দুয়োপাৰৰ বিস্তীৰ্ণ অঞ্চল ৷
বানে ঘৰ-বাৰী, খেতি পথাৰ বুৰাই ব্যাপক ক্ষতি সাধন কৰে ৰাইজৰ (Flood in Assam) ৷ বানৰ পাছত আকৌ ভূতৰ ওপৰত দানৱ পৰাদি খহনীয়াই এফালৰ পৰা ঢাঁহি-মুহি নিয়ে খেতি পথাৰ তথা নৈৰ পাৰত বসতি স্থাপন কৰা লোকসকলৰ বাসগৃহ (Erosion hits riverside people in Assam) ৷ এনেদৰেই নৈৰ বুকুত লীন হৈ যায় বহুলোকৰ সপোন ৷ শেহতীয়াকৈ খহনীয়াৰ ফলত শিৱসাগৰ জিলাৰ ঐতিহাসিক আজান পীৰ দৰগাহলৈ কঢ়িয়াই আনিছে অশনি সংকেত ৷
ব্ৰহ্মপুত্ৰৰ খহনীয়াই স’ৰাগুৰি চাপৰিত ভয়ংকৰ ৰূপ ধাৰণ কৰাত ঐতিহাসিক আজান পীৰ দৰগাহৰ প্ৰতি কঢ়িয়াই আনিছে ভাবুকি (Ajan Pir Dargah under threat of erosion of Brahmaputra) । কেমেৰাৰ সন্মুখতে চপৰা চপৰে খহিছে স'ৰাগুৰি চাপৰিৰ গৰা (Erosion in Amguri) । যিকোনো মুহূৰ্ততে ব্ৰহ্মপুত্ৰৰ খনীয়াই নিশেষ কৰি দিব পাৰে ঐতিহাসিক স’ৰাগুৰি চাপৰিত অৱস্থিত আজান পীৰ দৰগাহ শ্বৰিফ । ২০১০ চনৰ পৰাই ঐতিহাসিক স’ৰাগুৰি চাপৰিত ব্ৰহ্মপুত্ৰৰ খহনীয়াই ভয়ংকৰ ৰূপ ধাৰণ কৰি আহিছে (Erosion in Brahmaputra)।
ইফালে খহনীয়াৰ তাণ্ডৱত উপায়বিহীন ইয়াৰ দাঁতিকাষৰীয়া ৰাইজ ৷ ভয়, শংকাত এতিয়া দিন পাৰ কৰিবলগীয়া হৈছে স্থানীয় ৰাইজে ৷ তেওঁলোকৰ অভিযোগ, জনপ্ৰতিনিধি কিম্বা চৰকাৰক বহুবাৰ আবেদন নিবেদন কৰিও কোনো সঁহাৰি লাভ নকৰিলে ৷ সেয়ে এতিয়া চাপৰিৰ গাঁওবাসী শৰণাপন্ন হৈছে মহাবাহুৰ । লগতে চাকি-বন্তি জ্বলাই, ধূপ-দীপ দি প্ৰাৰ্থনা জনাইছে নেদেখাজনৰ ওচৰত । অসমৰ অন্যতম ঐতিহাসিক স্থান স'ৰাগুৰি চাপৰি যাতে ব্ৰহ্মপুত্ৰৰ খহনীয়াৰ পৰা ৰক্ষা পৰা তথা এই লৈ চৰকাৰৰ দৃষ্টিগোচৰ কামনা কৰি সেৱা লৈছে গাঁওবাসীয়ে ৷
উল্লেখ্য যে বনভোজস্থলী হিচাপেও পৰিচিত স'ৰাগুৰি চাপৰিলৈ প্ৰতিবছৰে অসমৰ বিভিন্ন জিলাৰ পৰা বনভোজ খাবলৈ আহে বহু লোক । আনহাতে ঐতিহাসিক স্থান হিচাপে আজান পীৰ দৰগাহ শ্বৰিফলৈ (Ajan Pir Dargah) বছৰৰ বিভিন্ন সময়ত দেশী-বিদেশী পৰ্যটক আহি দৰ্শন কৰে । সেয়েহে এই ঐতিহাসিক স্থান ৰক্ষাৰ্থে ৰাজ্যৰ জলসম্পদ বিভাগৰ লগতে মুখ্যমন্ত্ৰীৰ হস্তক্ষেপ বিচাৰিছে অঞ্চলবাসীয়ে । খহনীয়া ৰোধ কৰা আৰু আজান পীৰ দৰগাহ, স'ৰাগুৰি চাপৰিক ৰক্ষা কৰিবলৈ মুখ্যমন্ত্ৰীৰ হস্তক্ষেপ বিচাৰিছে অঞ্চলবাসীয়ে ।
লগতে পঢ়ক: Erosion at Amguri: আমগুৰি সমষ্টিৰ ৰূপহীমুখত ব্ৰহ্মপুত্ৰৰ ব্যাপক খহনীয়া
