আমগুৰি, ১১ অক্টোবৰ : আমগুৰিৰ খৰাগড়ত হাহাকাৰ পৰিৱেশ । তেল আৰু প্ৰাকৃতিক গেছ নিগমৰ খাৰুৱা তেলৰ পাইপ ফুটি তেল নিৰ্গমন অঞ্চলটোত (ONGC oil pipe leakage in Amguri)। লগে লগে অঞ্চলটোৰ ৰাইজৰ মাজত আতংকময় পৰিৱেশে বিৰাজ কৰে ।
জানিব পৰা মতে খৰাগড়ৰ মোহন হাজৰিকা আৰু ফুকন আলি সংযোগী পথৰ ওপৰতে খাৰুৱা তেল নিৰ্গমন হৈছে । চাৰিআলি জিজিএচৰ অন্তৰ্গত খৰাগড় পথত এই ঘটনা সংঘটিত হৈছে । ইফালে পুৰণি পাইপ মেৰামতি নকৰাৰ ফলতেই বছৰত চাৰিবাৰকৈ পাইপ ফুটি তেল নিৰ্গমন হোৱাৰ অভিযোগ উত্থাপন হৈছে । অ'এনজিচি কৰ্তৃপক্ষৰ বিৰুদ্ধে ক্ষোভ প্ৰকাশ কৰিছে আতংকিত স্থানীয় লোকে (Public anger against ONGC)।
খৰাগড় পথৰ কাষেৰে যোৱা এই খাৰুৱা তেলৰ পাইপ স্থানান্তৰ কৰিবলৈও দাবী উত্থাপন কৰিছে ৰাইজে । তেল নিৰ্গমন হোৱাৰ দৃশ্য প্ৰত্যক্ষ কৰাৰ লগে লগে অঞ্চলটোৰ ৰাইজে আৰক্ষীক খবৰ দিয়ে । আমগুৰি আৰক্ষীও ঘটনাস্থলীত উপস্থিত হয় ।
সমান্তৰালকৈ আৰক্ষীয়ে অ'এনজিচি কৰ্তৃপক্ষক বিষয়টো অৱগত কৰে । কিন্তু অ'এনজিচি কৰ্তৃপক্ষ ঘটনাস্থলীত বহু পলমকৈ উপস্থিত হোৱাত ক্ষোভিত হৈ পৰে অঞ্চলটোৰ ৰাইজ । অৱশ্যে পৰৱৰ্তী সময়ত অ'এনজিচি কৰ্তৃপক্ষই তেল নিৰ্গমন বন্ধ কৰিবলৈ সক্ষম হয় ।
লক্ষণীয়ভাৱে প্ৰায়ে অঞ্চলটোত এনেদৰে খাৰুৱা তেল নিৰ্গমন হোৱা দেখা যায় । যাৰ বাবে চৰম নিৰাপত্তাহীনতাত ভূগিছে অঞ্চলটোৰ ৰাইজ । ৰাইজৰ অভিযোগ বাঘজান কাণ্ডৰ (Baghjan tragedy) পৰাও শিক্ষা লোৱা নাই অ'এনজিচি কৰ্তৃপক্ষই ।
যাৰ বাবে কৰ্তৃপক্ষৰ দায়িত্বহীনতাৰ বিৰুদ্ধে অতি শীঘ্ৰে প্ৰতিবাদী কাৰ্যসূচী ৰূপায়ণ কৰাৰো হুংকাৰ দিয়ে ৰাইজে (Public to protest against ONGC)। খাৰুৱা তেলৰ পাইপ ফুটি তেল নিৰ্গমন হোৱাৰ ঘটনা এয়াই প্ৰথম নহয় । প্ৰায়ে অঞ্চলটোত এনে ঘটনা সংঘটিত হৈ আহিছে ।
শেহতীয়াকৈ দিহিং পাটকাই ৰাষ্ট্ৰীয় উদ্যানৰ ভিতৰতো তেল পৰিবাহী পাইপ ফাটি তেল নিৰ্গমন হৈছিল (pipeline ruptured inside Dehing Patkai) ৷ ফলত ৰাষ্ট্ৰীয় উদ্যানখনত থকা জৈৱ বৈচিত্ৰৰ প্ৰতি ভাবুকিৰ সৃষ্টি কৰিছে ৷ কিন্তু ইমানৰ পাছতো কিয় সংশ্লিষ্ট কৰ্তৃপক্ষই বিষয়টো গুৰুত্ব সহকাৰে লোৱা নাই সেয়াহে ডাঙৰ প্ৰশ্ন !
লগতে পঢ়ক :বৰ্তমানেও সন্ধান নাই কাজিৰঙাত ট্ৰাকত খুন্দাত আহত গঁড়টোৰ
