আমগুৰি,৬ মে: শিৱসাগৰৰ হালোৱাটিঙত ক’ৰণাত আক্ৰান্ত হৈ এজন ব্যক্তিয়ে মৃত্যুক আকোঁৱালি লৈছে ৷ ক’ৰণাৰ দ্বিতীয় লহৰত হালোৱাটিঙৰ নেপালী বস্তি জয়নুৰ আলী( ৬৫) নামৰ ব্যক্তিজনৰ ঘৰতে মৃত্যু হয় ৷ উল্লেখযোগ্য যে, কিছুদিনৰ পৰা জ্বৰত ভোগি থকা ব্যক্তিজনে টীয়কৰ এজন চিকিৎসকৰ ওচৰত চিকিৎসা কৰি আছিল যদিও মঙলবাৰে তেওঁৰ ক’ভিড টেষ্ট কৰাত পজিটিভ ধৰা পৰে ৷ তাৰ পিছতে ব্যক্তিগৰাকীৰ বুধবাৰে নিশা মৃত্যু হয় ৷ সম্প্ৰতি প্ৰশাসনে ক’ভিড প্ৰট’কল অনুসৰি তেওঁৰ অন্তোষ্টিক্ৰিয়া সম্পন্ন কৰিবলৈ নিৰ্দেশ দিছে ৷
আনহাতে বৃহস্পতিবাৰে আমগুৰি আৰু ম’ৰাবজাৰত এজনকৈ লোক ক’ভিড-19 পজিটিভ ধৰা পৰে ৷ আমগুৰিত চিনাক্ত কৰা গৰাকী টিফুক চাহ বাগিচাৰ আৰু ম’ৰাবজাৰত চিনাক্ত কৰা গৰাকী জৰাবাৰী বামুণ গাঁৱৰ বুলি জানিব পৰা গৈছে ৷ ইফালে আমগুৰিত বৃহস্পতিবাৰে মুঠ পাঁচজনৰ দেহত ক’ভিড-19 পজিটিভ ধৰা পৰে ৷ ইয়াকে লৈ আমগুৰিত ক’ভিড-১৯ পজিটিভ ৰোগীৰ সংখ্যা 24 জনলৈ বৃদ্ধি পালে ৷ একেদৰে জাঁজী চিকিৎসালয়তো তিনি গৰাকী ব্যক্তি ক‘ভিড-19 পজিটিভ ধৰা পৰে ৷
লগতে পঢ়কঃ কোন হ’ব অসমৰ পৰৱৰ্তী মুখ্যমন্ত্ৰী ?
