নলবাৰী, 16 জুলাই : নলবাৰী জিলাৰ লগতে অসমৰ সাহিত্য জগতলৈ এক অনবদ্য অৱদান আগবঢ়োৱা বিশিষ্ট সাহিত্যিক ড0 বসন্ত কুমাৰ ভট্টাচাৰ্য অসমীয়া সাহিত্য জগতৰ এগৰাকী পুৰোধা ব্যক্তি । 1942 চনত নলবাৰীৰ বাউসীয়াপাৰা গাঁৱত জন্মগ্ৰহণ কৰা ড0 বসন্ত কুমাৰ ভট্টাচাৰ্য সৰুৰে পৰা অতি মেধাৱী আছিল । 1966 চনত তেওঁ গুৱাহাটী বিশ্ববিদ্যালয়ৰ পৰা অসমীয়া বিষয়ত স্নাতকোত্তৰ ডিগ্ৰী আৰু 1996 চনত ডক্টৰেট ডিগ্ৰী লাভ কৰিছিল ।
1967 চনত সাহিত্যিক ড0 ভট্টাচাৰ্যই সৰভোগৰ বৰনগৰ কলেজত অসমীয়া বিভাগৰ প্ৰবক্তা হিচাপে কৰ্মজীৱনৰ পাতনি মেলিছিল । ইয়াৰ পিছত তেওঁ 1968 চনত নলবাৰী কলেজত অসমীয়া বিভাগৰ প্ৰবক্তা হিচাপে কাম কৰি 2002 চনত মুৰব্বী অধ্যাপক হিচাপে অৱসৰ গ্ৰহণ কৰে । সাহিত্যিক তথা অধ্যাপক গৰাকীয়ে পঢ়ি থকাৰ সময়ছোৱাৰে পৰা লিখা-মেলাৰ কাম আৰম্ভ কৰিছিল ৷ প্ৰথম অৱস্থাত বিভিন্ন আলোচনী, বাতৰি কাকত আদিত লিখা-মেলা কৰিছিল যদিও পৰৱৰ্তী সময়ত 75 খনকৈ গ্ৰন্থ প্ৰকাশ কৰে সাহিত্যিকগৰাকীয়ে । তেওঁৰ গ্ৰন্থসমূহৰ ভিতৰত ভাষা বিজ্ঞান প্ৰৱেশ, দুহাত মেলি শূন্যতাত, স্বপ্ন দুস্বপ্নৰ ভগ্নাংশ, লফা হালি পৰে পাতে আদি অন্যতম ৷
সম্প্ৰতি বিভিন্ন অনুষ্ঠান-প্ৰতিষ্ঠান,সাহিত্য-সংস্কৃতিৰ সৈতে জড়িত হৈ আছে সাহিত্যিকগৰাকী । অৱসৰপ্ৰাপ্ত কলেজ শিক্ষক সংস্থাৰ লগতে তেওঁ বৰ্তমান সদৌ অসম কবি সন্মিলনৰ সভাপতিৰ আসন অলংকৃত কৰি আছে । বহুকেইটা গুণৰ অধিকাৰী হৈয়ো কিন্তু এক সাধাৰণ জীৱন-যাপন কৰি আছে সাহিত্যিক বসন্ত কুমাৰ ভট্টাচাৰ্যই । সাহিত্যিক তথা নাট্যকাৰ ড0 ভট্টাচাৰ্যক ইতিমধ্যে বিভিন্ন সন্মানেৰে সন্মানিত কৰা হৈছে ৷ সমন্বয় বঁটা, ৰামধেনু বঁটা, এনাজৰী বঁটা, অসম নাট্য সন্মিলনৰ দ্বাৰা কৃপানাথ বৈশ্য সাহিত্য বঁটাৰে তেওঁক সন্মানিত কৰা হয় ৷ 2016 চনত ড0 ভট্টাচাৰ্যক অসম সাহিত্য সভা সমাৱৰ্তন পৰম বিশিষ্ট সন্মান ‘সাহিত্যচাৰ্য’ উপাধিৰে সন্মানিত কৰা হয় । 2014 চনত নলবাৰী সাহিত্য সভাই তেওঁক ‘নলবাৰী ৰত্ন’ বঁটা প্ৰদান কৰে ।
বাউসীয়াপাৰাৰ পৰা নলবাৰীৰ চহৰৰ বিদ্যাপুৰত 78 বছৰীয়া সাহিত্যিকগৰাকীয়ে পত্নী, পুত্ৰ-বোৱাৰী, নাতি-নাতিনীৰ সৈতে সুখেৰে বাস কৰে । বিলাসী জীৱনৰ প্ৰতি মোহ নথকা এইগৰাকী সাহিত্যিকে আজিও ব্যস্ত হৈ থাকে সাহিত্য চৰ্চাত । অৱসৰ বিনোদনৰ সময়ত তেওঁৰ মন-মগজু আজিও ব্যস্ত কেৱল ‘কিতাপ’ত ।
লগতে পঢ়ক : যোৰহাটত ফ্লপ শ্ব’লৈ পৰিণত লক ডাউন
