নলবাৰী, ২৫ ফেব্ৰুৱাৰী: নলবাৰী জিলাৰ বিজুলীঘাট কৰিয়াত হাজো-নলবাৰী পথচোৱাৰ বিধস্ত ৰূপ দেখি ক্ষোভিত নলবাৰী জিলা অসম জাতীয়তাবাদী যুৱ ছাত্র পৰিষদ । ফলত বুধবাৰে তীব্ৰ প্ৰতিবাদত নামি পৰিল সংগঠনটো । উক্ত পথচোৱা অৱৰোধ সংগঠনটোৰ । প্ৰতিবাদৰ সময়ত পথচোৱাত যান যঁটৰ সৃষ্টি হোৱাত আৱদ্ধ হ'বলগীয়া হয় বৰক্ষেত্ৰী সমষ্টিৰ বিধায়ক নাৰায়ণ ডেকা ।
বিধায়কগৰাকীক দেখি অধিক প্ৰতিবাদমুখৰ হৈ পৰিল নলবাৰী জিলা অসম জাতীয়তাবাদী যুৱ ছাত্র পৰিষদ । নাৰায়ণ ডেকা মুৰ্দাবাদ, সুমন হৰিপ্ৰিয়া মুৰ্দাবাদ, হিমন্ত বিশ্ব মুৰ্দাবাদ ধ্বনিৰে সংগঠনটোৱে উত্তাল কৰি তোলে ৰাজপথ । ইফালে, সংগঠনটোৱে প্ৰতিবাদ সাব্যস্ত কৰি থাকোতে বিধায়ক নাৰায়ণ ডেকা উপস্থিত হৈ অতিশীঘ্ৰে উক্ত পথচোৱাৰ কাম আৰম্ভ কৰাৰ আশ্বাস প্ৰদান কৰে ।
সদা ব্যস্ত এই পথচোৱাৰে দৈনিক আহ-যাহ কৰে হাজাৰ হাজাৰ লোক । যাতায়তৰ ক্ষেত্ৰত দুৰ্ভোগ ভুগি আহিছে নিতৌ শ শ লোকে । লক্ষণীয় যে, পৰিৱৰ্তনৰ লক্ষ্যৰে শাসনৰ গাদী দখল কৰা চৰকাৰে প্ৰায় পাঁচ বছৰ সম্পূৰ্ণ হোৱাৰ পাচতহে চকু পৰিল বিধায়কগৰাকীৰ । পথচোৱাৰ মেৰামতিৰ বাবে সংগঠনটোৱে বিধায়কগৰাকীক এখন স্মাৰক পত্ৰ প্ৰদান কৰে ।
লগতে পঢ়ক:চাহ শ্ৰমিকৰ মজুৰি বাঢ়িল মাত্ৰ ৫০ টকা !
