নলবাৰী,13 মাৰ্চঃ কৰ’ণা ভাইৰাছৰ সংক্ৰমণ ৰোধৰ বাবে শুকুৰবাৰে নলবাৰীৰ জিলা উপায়ুক্ত ভাৰত ভূষণ দেৱচৌধুৰীৰ তৎপৰতাত উপায়ুক্তৰ সভাকক্ষত এক জৰুৰীকালীন সভা অনুষ্ঠিত কৰা হয় ৷ সভাখনত অংশগ্ৰহণ কৰে স্বাস্থ্য বিভাগকে আদি কৰি জিলাখনৰ সকলো বিভাগৰ মুৰব্বী তথা দুৰ্যোগ ব্যৱস্থাপনা বিভাগৰ বিষয়া-কৰ্মচাৰীসকলে ৷ উক্ত সভাত কৰ’ণা ভাইৰাছ সন্দৰ্ভত গ্ৰহণ কৰিবলগীয়া ব্যৱস্থাসমূহৰ পৰ্যালোচনা কৰা হয় ৷ উল্লেখ্য যে, সভাখনৰ জৰিয়তে জিলাখনলৈ বিদেশ বা বহিঃৰাজ্যৰ কোনো ব্যক্তিৰ আগমন হ'লে গাঁওবুঢ়াসকলক চক্ৰ বিষয়াক অৱগত কৰিবলৈ নিৰ্দেশ প্ৰদান কৰে উপায়ুক্তগৰাকীয়ে ৷ ইয়াৰ বাবে জিলাখনৰ বিভিন্ন চিকিৎসালয়ত ইতিমধ্যে আছুতীয়া বিচনা আৰু কক্ষ স্থাপন কৰা হৈছে । প্ৰয়োজন সাপেক্ষে ইয়াৰ সংখ্যা আৰু বৃদ্ধি কৰা হ’ব বুলি উপায়ুক্তগৰাকীয়ে জানিবলৈ দিয়ে ।
আনহাতে, কোনো ব্যক্তিৰ শৰীৰত এই ভাইৰাছৰ লক্ষণসমূহ পৰিলক্ষিত হ'লে ব্যক্তিগৰাকীক আছুতীয়াকৈ ৰখাৰ উপৰিও নমুনা সংগ্ৰহ কৰি গুৱাহাটী চিকিৎসা মহাবিদ্যালয় হাস্পতালৰ নিৰ্দিষ্ট পৰীক্ষাগাৰলৈ পঠোৱাৰ বাবে স্বাস্থ্য বিভাগক নিৰ্দেশ দিয়ে । জিলাখনত ১০৮সেৱা আৰু এম্বুলেঞ্চসমূহ যাতে ২৪ঘণ্টা সাজু হৈ থাকে তাৰ ব্যৱস্থা কৰিবলৈ স্বাস্থ্য বিভাগক নিৰ্দেশ দিছে উপায়ুক্ত চৌধুৰীয়ে ৷
সমান্তৰালকৈ হাট-বজাৰ আৰু ব্যৱসায়িক প্ৰতিষ্ঠানসমূহ পৰিস্কাৰকৈ ৰাখিবলৈ গাঁও পঞ্চায়ত আৰু পৌৰসভাক নিৰ্দেশ দিয়ে উপাযুক্ত গৰাকীয়ে ৷ তদুপৰি, বিষয়া-কৰ্মচাৰীসকলৰ ঘৰলৈ কোনো আলহী-অতিথি আহিলে সাৱধানে থাকিবলৈ উপায়ুক্তগৰাকীয়ে আহ্বান জনায় । যথাসম্ভৱ মানুহৰ সমাগম পৰিহাৰ কৰিবলৈ চৌধুৰীয়ে আহ্বান জনাইছে ৰাইজক ৷
শুকুৰবাৰে অসম চৰকাৰৰ মুখ্য সচিবে কৰ’ণা ভাইৰাছ সম্পৰ্কত উপায়ুক্ত সমন্বিতে স্বাস্থ্য বিভাগকে ধৰি কেইবাটাও বিভাগৰ সৈতে ভিডিঅ' কনফাৰেঞ্চযোগে সতৰ্কমূলক ব্যৱস্থা গ্ৰহণ কৰিবলৈ আহ্বান জনোৱাৰ পৰিপ্ৰেক্ষিতত জৰুৰীকালীন সভাখন অনুষ্ঠিত কৰা হয় । উপায়ুক্ত ভাৰত ভূষণ দেৱচৌধুৰীয়ে জিলাখনৰ ৰাইজৰ সুবিধাৰ বাবে বিনামূলীয়া দূৰভাষ নম্বৰ ০৩৬২৪-২২০২১৯ আৰু ১০৭৭ মুকলি কৰে ৷ যাতে ক'ৰোনা ভাইৰাচ সম্পৰ্কত কিবা জনাবলগীয়া বা জানিবলগীয়া থাকে সেইবোৰ সৰ্বসাধাৰণ ৰাইজে জনাব পাৰে ৷
লগতে চাওকঃভাৰতত কৰ’ণা ভাইৰাছত আক্ৰান্তৰ সংখ্যা 75 লৈ বৃদ্ধিঃকেন্দ্ৰীয় স্বাস্থ্য মন্ত্ৰালয়
