বঙাইগাঁও,19 জানুৱাৰীঃ চিলিণ্ডাৰ যোগানৰ ক্ষেত্ৰত চূড়ান্তভাৱে ব্যৰ্থ হৈছে বঙাইগাঁৱৰ এলছন ৰন্ধন গেছ এজেঞ্চি ৷ সম্প্ৰতি গেছ চিলিণ্ডাৰ বিচাৰি ৰাইজৰ মাজত হাহাকাৰ পৰিস্থিতিৰ সৃষ্টি হৈছে বঙাইগাঁৱত ৷ তদুপৰি এজেঞ্চিটোৰ একাংশ কৰ্মচাৰীৰ বিৰুদ্ধে গ্ৰাহকক দুৰ্ব্যৱহাৰ কৰাৰো অভিযোগ উত্থাপিত হৈছে ৷ ফলত দেওবাৰে বহুসংখ্যক গ্ৰাহকে ক্ষোভৰ বশৱৰ্তী হৈ উপস্থিত হয় স্বয়ং যোগানমন্ত্ৰী ফণীভূষণ চৌধুৰীৰ বঙাইগাঁৱস্থিত বাসগৃহত ৷
বঙাইগাঁও চহৰৰ জিলা উপায়ুক্ত কাৰ্যালয়ৰ সমীপতে থকা গেছ এজেঞ্চিটোৱে দীৰ্ঘদিনে গ্ৰাহকক হাৰাশাস্তি কৰি আহিছিল ৷ এজেঞ্চিটোৰ সৰহ সংখ্যক গ্ৰাহকে চাৰি-পাঁচদিন আগতেই বুকিং আৰু চিলিণ্ডাৰ কিনাৰ ৰচিদ লাভ কৰে ৷ যদিও এটা চিলিণ্ডাৰৰ বাবে খাপ-পিতি বিফল মনোৰথেৰে ঘৰলৈ ওভটিবলগীয়া হয় ৷ আন দিনাৰ দৰে দেওবাৰেও গ্ৰাহকসকলে পুৱা পাঁচ বজাৰ পৰা ন বজালৈ খালি চিলিণ্ডাৰলৈ লাইন পাতি থাকে ৷ ইয়াৰ পিছত এজেঞ্চি কৰ্তৃপক্ষৰ নেতিবাচক মন্তব্য লাভ কৰাত স্বাভাৱিকতে গ্ৰাহকসকলে এক হুলস্থুলীয়া পৰিৱেশৰ সৃষ্টি কৰে ৷ ৰাইজৰ অভিযোগ "চাৰি-পাঁচদিন পূৰ্বে গেছৰ বুকিং কৰি গেছ কিয় নাই বুলি এজেঞ্চিৰ কৰ্মীক প্ৰশ্ন কৰাত, কৰ্মীসকলে কয়-আমি নাজানো ওচৰতে যোগানমন্ত্ৰী ফণীভূষণ চৌধুৰীৰ ঘৰ, তাতে গৈ সোধক" ৷
ইয়াৰোপৰি এজেঞ্চিটোয়ে দীৰ্ঘদিনৰ পৰাই চিলিণ্ডাৰ বুকিং ব্যৱস্থাটো কৌশলেৰে বন্ধ কৰি এখন ক’লা বজাৰৰ সৃষ্টি কৰিছে ৷ দৈনিক কম সংখ্যক গ্ৰাহকৰ মাজত চিলিণ্ডাৰ বিতৰণ কৰি সৰহ সংখ্যক ক’লা বজাৰত বিক্ৰী কৰাৰ অভিযোগ উত্থাপন কৰিছে গ্ৰাহকে । মাত্ৰ গ্ৰাহকক যোগান নাই বুলি কৈ দায়িত্ব সাৰে এজেঞ্চি কৰ্তৃপক্ষই ৷ ৰাইজে এই সন্দৰ্ভত স্বয়ং যোগানমন্ত্ৰীক প্ৰশ্ন কৰাত ক্ষোভ প্ৰকাশ কৰে মন্ত্ৰী গৰাকীয়ে ৷ লগতে শীঘ্ৰে তদন্তৰ ঘোষণা জিলা প্ৰশাসনক দিয়াৰ আশ্বাস প্ৰদান কৰে আৰু অতিৰিক্ত উপায়ুক্ত উপস্থিত হৈ ঘটনাটোৰ তদন্ত কৰিব বুলি ৰাইজক জানিবলৈ দিয়ে মন্ত্ৰীগৰাকীয়ে ৷
উল্লেখযোগ্য যে,এজেঞ্চিৰ গুদাম ঘৰত চিলিণ্ডাৰ নাৰাখি অবৈধ গুদামতহে মজুত কৰি ৰাখে গেছ যোগান বিভাগে ৷ এজেঞ্চিৰ সমীপৰ পৰা চিলিণ্ডাৰ বিতৰণ কৰাৰ নামত গ্ৰাহকৰ পৰা অতিৰিক্ত ধন আদায় লয় এজেঞ্চিটোৱে ৷ সমগ্ৰ কাণ্ডটো দেখিও নেদেখাৰ ভাও জুৰি থাকে স্থানীয় যোগান বিভাগে ৷
লগতে চাওকঃকামাখ্যা ৰে'লৱে ষ্টেচনৰ পৰা বৈষ্ণু দেৱী মন্দিৰলৈ 'পুণ্যধাম যাত্ৰা'
