ছিডনী : ভাৰত আৰু অষ্ট্ৰেলিয়াৰ মাজত চলিত ব'ৰ্ডাৰ-গাভাস্কাৰ ট্ৰফীৰ ছিডনীত অনুষ্ঠিত পঞ্চম টেষ্টৰ দ্বিতীয় দিনা ভাৰতীয় শিবিৰত এক মোক্ষম আঘাত । ভাৰতীয় অধিনায়ক তথা কেংগাৰু বেটাৰক বিষাক্ত বলিং স্পেলেৰে শ'লঠেকত পেলোৱা যশপ্ৰীত বুমৰাহ আঘাতপ্ৰাপ্ত হয় । যাৰ বাবে তেওঁ খেলপথাৰৰ বাহিৰলৈ যাবলগা হয় । তেওঁৰ ঠাইত তাৰকা বেটছমেন বিৰাট কোহলীয়ে ভাৰতীয় দলটোক নেতৃত্ব প্ৰদান কৰে ।
ছিডনীত আঘাতপ্ৰাপ্ত যশপ্ৰীত বুমৰাহে মধ্যাহ্নভোজন বিৰতিৰ পিছত দ্বিতীয় ছেছনৰ আৰম্ভণিতে এটা অ'ভাৰ বল কৰে । তাৰ ঠিক পিছতে তেওঁ খেলপথাৰ ত্যাগ কৰে আৰু তেতিয়াৰ পৰা তেওঁ খেলপথাৰৰ বাহিৰত আছে । অৱশ্যে তেওঁ কেনেকৈ আৰু কেতিয়া এই আঘাতৰ সন্মুখীন হয় সেয়া এতিয়াও স্পষ্ট নহয় ।
Hoping Jasprit Bumrah returns to the field soon. 🤞 pic.twitter.com/W1pKdzsr92
— Johns. (@CricCrazyJohns) January 4, 2025
জানিব পৰা মতে, বুমৰাহক আঘাতৰ স্কেনৰ বাবে চিকিৎসালয়লৈ লৈ যোৱা হয় । মেচৰ পোনপটীয়া সম্প্ৰচাৰৰ সময়ত টিভিত দেখুওৱা হৈছিল যে তেওঁ এখন গাড়ীত ছিডনী ক্ৰিকেট গ্ৰাউণ্ডৰ পৰা বাহিৰলৈ গৈ আছে । ইয়াৰ অৰ্থ হ'ল তেওঁ অন্ততঃ এইটো ছেছনত খেলপথাৰলৈ ঘূৰি আহিব নোৱাৰে । অৱশ্যে অধিক তথ্যৰ বাবে অপেক্ষা কৰা হৈছে ।
Jasprit Bumrah has left the SCG: https://t.co/0nmjl6Qp2a pic.twitter.com/oQaygWRMyc
— cricket.com.au (@cricketcomau) January 4, 2025
আনহাতে, যশপ্ৰীত বুমৰাহৰ আঘাত কিমান গুৰুতৰ সেই বিষয়েও কোনো তথ্য পোৱা হোৱা নাই । কিন্তু ভাৰতীয় অনুৰাগীসকলৰ এটাই আশা যে তেওঁ সোনকালেই খেলপথাৰলৈ উভতি আহিব ।
উল্লেখ্য যে বুমৰাহ হৈছে অষ্ট্ৰেলিয়াৰ বিৰুদ্ধে চলিত শৃংখলাত আটাইতকৈ সফল বলাৰ । ছিডনীত অনুষ্ঠিত শৃংখলাৰ নিৰ্ণায়ক মেচখনত খেলপথাৰত বুমৰাহৰ উপস্থিতি ভাৰতীয় দলৰ বাবে অতি গুৰুত্বপূৰ্ণ ।
