নলবাৰী, 8 জানুৱাৰী : ‘‘সমষ্টি পুনৰ নিৰ্ধাৰণৰ জৰিয়তে বিজেপিয়ে আমাৰ ৰাজ্যখনক সাম্প্ৰদায়িকৰূপে বিভাজন কৰিব খুজিছে ৷ হিন্দু-মুছলমানৰ ৰাজনীতি কৰিব খুজিছে বিজেপিয়ে ৷ লগতে বিজেপি আৰু RSS ৰ যি বৰ্ণবাদী ৰাজনীতি, সেই ৰাজনীতিৰে আমাক ভাগ কৰি পেলাব খুজিছে ৷’’ দেওবাৰে নলবাৰীৰ মুকালমুৱাত আয়োজিত ৰাইজৰ দলৰ দ্বিতীয় প্ৰতিষ্ঠা দিৱসৰ কাৰ্যসূচীত (Foundation day of Raijor dal) উপস্থিত হৈ সংবাদ মাধ্যমৰ আগত এই মন্তব্য কৰে ৰাইজৰ দলৰ সভাপতি অখিল গগৈয়ে ৷
লগতে তেওঁ কয়, ‘‘আগন্তুক নিৰ্বাচনত প্ৰতিটো সমষ্টিতে কেৱল বিজেপিয়েহে যাতে জয়লাভ কৰিব পাৰে, তেনেকুৱা ধৰণে বিজেপিয়ে সমষ্টি পুনৰ নিৰ্ধাৰণ কৰিবলৈ চেষ্টা কৰিছে ৷ গতিকে এই সাম্প্ৰদায়িক দলৰ যি ব্যৱস্থা তাক আমি বিৰোধিতা কৰিছো ৷ সেয়ে ভাৰতৰ নিৰ্বাচন আয়োগক এই সংক্ৰান্তত সকলো তথ্য বিচাৰ কৰি গণতান্ত্ৰিকভাৱে এই কাৰ্য সমাধান কৰিবলৈ দাবী উত্থাপন কৰিছো’’ ৷
আনকি এই সভাতে সাংবাদিকৰে হোৱা বাৰ্তালাপত ৰাইজৰ দলৰ সভাপতিগৰাকীয়ে কমতাপুৰ গঠন হোৱা সংক্ৰান্ততো নিজৰ মন্তব্য প্ৰদান কৰে (Akhil Gogoi reacts on Separate Kamatapur state) ৷ কমতাপুৰ গঠন সন্দৰ্ভত তেওঁ কয়, ‘‘কোঁচ ৰাজবংশী ৰাইজে সদায় নিজৰ অধিকাৰৰ বাবে লাগি আহিছে ৷ আমি কোঁচ ৰাজবংশী ৰাইজৰ স্ব-অধিকাৰক সন্মান কৰো ৷ কিন্তু কমতাপুৰ সন্দৰ্ভত কোনোধৰণৰ চৰ্চা আৰম্ভ হোৱা নাই ৷ আমি সকলো দল-সংগঠন বা ৰাইজে একেলগে বহি লৈ এই সন্দৰ্ভত এটা ভাল সিদ্ধান্ত গ্ৰহণ কৰিম’’ ৷
তেওঁ আৰু কয়, ‘‘কোঁচ ৰাজবংশীসকল বিশেষ অসমীয়া ৷ সদায় আসমীয়া, খিলঞ্জীয়া অসমীয়া ৷ তেওঁলোকক বাদ দি কেতিয়াও অসমখনক কল্পনাই কৰিব নোৱাৰো ৷ গতিকে কোঁচ ৰাজবংশীসকলক লগত লৈ অসমখন ঐক্যবদ্ধ হৈ থাকিব লাগে তাৰে আমি কল্পনা কৰো’’ ৷
মুখ্যমন্ত্ৰী ড৹ হিমন্ত বিশ্ব শৰ্মা সন্দৰ্ভত সাংবাদিকে কৰা প্ৰশ্নৰ উত্তৰত তেওঁ কয়, ‘‘হিমন্ত বিশ্ব শৰ্মা সদায় সাম্প্ৰদায়িক ৷ গতিকে সাম্প্ৰদয়িক মন্তব্য কৰা হিমন্ত বিশ্ব শৰ্মাক ৰাজনীতিৰ পৰা বিদায় দিব লাগে’’ ৷ ইফালে ৰাইজৰ দলৰ আমন্ত্ৰণমৰ্মে একেটা অনুষ্ঠানত উপস্থিত থাকে অসম জাতীয় পৰিষদৰ সাধাৰণ সম্পাদক জগদীশ ভূঞা । একেখন মঞ্চতে দেখা পোৱা গ’ল দুয়োটা আঞ্চলিক দলৰ নেতৃত্বক ।
এই অনুষ্ঠানত উপস্থিত থাকি অসম জাতীয় পৰিষদৰ সাধাৰণ সম্পাদকগৰাকীয়ে কয়, ‘‘সকলো আঞ্চলিক দলৰে আদৰ্শগত বা নীতিগত বৈশিষ্ট আছে ৷ কিন্তু আগন্তুক 2024 আৰু 2026 ৰ নিৰ্বাচনত বিজেপি আৰু AIUDF ক পৰাভূত কৰিবৰ বাবে সকলো আঞ্চলিক দলে একলগ হৈ চেষ্টা কৰিলে ভাল ৷ সেই কথা আমি সময়ে সময়ে কৈ আহিছো’’ ৷
উল্লেখ্য যে, দেওবাৰে নলবাৰীৰ মুকালমুৱাত আড়ম্বৰপূৰ্ণভাৱে আয়োজন কৰা হয় ৰাইজৰ দলৰ দ্বিতীয় প্ৰতিষ্ঠা দিৱস । উক্ত অনুষ্ঠানত পুৱা পতাকা উত্তোলন কৰা হয় ৷ লগতে কা আন্দোলনৰ শ্বহীদক স্মৰণ কৰি এক শ্ৰদ্ধাঞ্জলি অনুষ্ঠানৰো আয়োজন কৰা হয় ৷
এই অনুষ্ঠানতে ৰাইজৰ দলৰ সভাপতি অখিল গগৈ, অসম জাতীয় পৰিষদৰ সাধাৰণ সম্পাদক জগদীশ ভূঞাৰ লগতে ৰাইজৰ দলৰ কেবাগৰাকীও বিষয়ববীয়া আৰু অঞ্চলটোৰ বহু ৰাইজ উপস্থিত থাকে ৷
লগতে পঢ়ক : Foundation day of Raijor dal: ৰাইজৰ দলৰ প্ৰতিষ্ঠা দিৱসৰ মঞ্চত একেলগে বহিব ৰাইজৰ দল-অসম জাতীয় পৰিষদ
