কলিয়াবৰ, ১৯ ডিচেম্বৰ : প্ৰায় ১৩৫ কোটি টকাৰ ব্যয়েৰে কলং পুনৰুজ্জীৱিতকৰণৰ বাবে কলিয়াবৰৰ হাতীমূৰাৰ কলংমুখত কলং বোৱতীকৰণৰ প্ৰকল্প গ্ৰহণ কৰিছিল চৰকাৰে । নগাঁও জিলাৰ মাজেৰে বৈ যোৱা কলঙক পুনৰ বোৱতী কৰিবৰ বাবে ২০২০ চনৰ ৩০ অক্টোবৰতে তদানীন্তন জলসম্পদ মন্ত্ৰী কেশৱ মহন্তই শুভাৰম্ভ কৰিছিল প্ৰকল্পৰ কাম ।
৩ বছৰ এমাহ ২০ দিন পাৰ হ’ল প্ৰকল্পৰ নিৰ্মাণৰ কাম । মঙলবাৰে জলসম্পদ মন্ত্ৰী পীযুষ হাজৰীকাই পৰিদৰ্শন কৰে হাতীমূৰাৰ কলংমুখৰ কাম । তেওঁক সংগ দিয়ে মন্ত্ৰী কেশৱ মহন্তই । ইয়াৰ পূৰ্বেও জলসম্পদ মন্ত্ৰী পীযুষ হাজৰীকাই ২০২১ বৰ্ষৰ ২৩ মে’ত কলিয়াবৰৰ হাতীমূৰাৰ কলংমুখৰ কাম পৰিদৰ্শন কৰিছিল । কলং কেইবা শতিকাজুৰি মধ্য অসমৰ সামাজিক তথা সাংস্কৃতিক জীৱনৰ দলিলস্বৰূপ ।
৭০ দশকৰ পৰা মৃতপ্ৰায় হোৱা কলঙক পুনৰুজ্জীৱিত কৰাৰ বাবে স্থানীয় ৰাইজে আবেদন কৰি আহিছিল । উল্লেখ্য যে ১৯৬৪ চনতে কলিয়াবৰৰ হাতীমূৰাত বান্ধ দিয়াৰ ফলত মৰাসুঁতিত পৰিণত হৈছিল কলং সুঁতি ৷ এই সুঁতি ব্ৰহ্মপুত্ৰ নদীৰ পৰা ওলাই নগাঁও জিলাৰ মাজেৰে বৈ গৈ পুনৰ ব্ৰহ্মপুত্ৰ নদীত পৰিছেগৈ । ১৯৬৪ চনত নগাঁও নগৰক কলঙৰ বানৰ পৰা ৰক্ষা কৰিবলৈ কলঙৰ মুখত মথাউৰি নিৰ্মাণেৰে এখন জীৱিত নদীক হত্যা কৰা হৈছিল ।
পিচৰ বছৰেই এই মথাউৰিটো ভাঙি নিয়াত পুণৰ নিৰ্মাণ কৰা মথাউৰিটো ১৯৭৩ চনত ব্ৰহ্মপুত্ৰই খহাই লৈ যায় । সেই সময়তে কলঙক বোৱাই নিবলৈ এক প্ৰচেষ্টা আৰম্ভ হৈছিল । সেয়ে ১৯৭৪ চনত ১৪৪ ধাৰা বলৱৎ কৰিহে বৰ্তমানৰ হাতীমূৰা আৰু কুকুৰাকটা পাহাৰ সংযোগী মথাউৰি চৰকাৰে নিৰ্মাণ কৰিবলগীয়া হৈছিল । সমান্তৰালকৈ এটা পক্ষই কলংখনক বোৱাই নিয়াৰ বাবে এক নিৰৱ চেষ্টা চলাই যায় ।
এই চেষ্টাৰ ফলশ্ৰুতিতে কলিয়াবৰৰ তদানীন্তন জলসম্পদ মন্ত্ৰী কেশৱ মহন্তৰ প্ৰচেষ্টাৰ ফলশ্ৰুতিত কলং বোৱাই নিয়াৰ পৰিকল্পনাৰে আন্তজাৰ্তিক খ্যাতিসম্পন্ন কেন্দ্ৰীয় জলসম্পদ বিভাগৰ অধীনস্থ প্ৰতিষ্ঠান WAPCOS-ক ২০১৯ চনত কলং উন্নয়নৰ দায়িত্ব অৰ্পণ কৰা হয় । WAPCOS-ৰ জৰীপ, অনুসন্ধান, ক্ষেত্ৰ পৰিদৰ্শন, সমীক্ষাৰ অন্তত ২০২০ চনৰ জানুৱাৰী মাহত Rejuvenation of Kolong River (Construction of Intake and Appurtenant Structure) নামৰ এখন প্ৰাক্কলন প্ৰস্তুত কৰি কলঙৰ সামগ্ৰিক উন্নয়ন সম্পৰ্কীয় এই আন্তঃগাথঁনি নিৰ্মাণৰ ব্যয় আনুমানিক ১৩৫.৪০ কোটি নিৰ্ধাৰণ কৰা হৈছিল ।
লগতে পঢ়ক :পীযুষ হাজৰীকাৰ মতে কাজিৰঙাত বিজেপি মিত্ৰজোঁট জিকিব
