বটদ্ৰৱা, ১৯জুলাই : মহাপুৰুষ গুৰুজনাৰ জন্মস্থানৰ প্ৰৱেশ পথটোৰ গাতে লাগি থকা মাছৰ পাইকাৰী বজাৰত নিতৌ পুৱা আৰু বিয়লি বৃহৎ জন সমাগম । লক ডাউনৰ নীতি নিৰ্দেশনাক অংগুষ্ঠ দেখুৱাই জনসমাগমৰ মাজত দৈনিক চলিছে মাছৰ বজাৰ । নাই কোনো সামাজিক দূৰত্ব । ক্ৰেতা বিক্ৰেতা কোনোৱেই পৰিধান নকৰে মাস্কখনো । এনে অৱস্থাত ক'ৰণাৰ গণ সংক্ৰমণৰ ভয়ত থানলৈ আগমন ঘটা ভকত বৈষ্ণৱ সকলৰ মাজতো সৃষ্টি হৈছে আতংকৰ ।
নগাঁও জিলা প্ৰশাসনৰ কঠোৰ নিষেধাজ্ঞা থকাৰ পিছতো বটদ্ৰৱা আৰক্ষীৰ চকীৰ পৰা মাত্ৰ ১০০ মিটাৰ নিলগতে দৈনিক হৈছে শ শ লোকৰ জন সমাগম । এই লৈ অঞ্চলটোতো সৃষ্টি হৈছে তীব্ৰ প্ৰতিক্ৰিয়াৰ । ইতিমধ্যে বটদ্ৰৱা থান পৰিচালনা সমিতিয়ে নগাঁও জিলা প্ৰশাসনক মাছৰ এই পাইকাৰী বজাৰ সন্দৰ্ভত লিখিত অভিযোগ দাখিল কৰিছে । কিন্তু বটদ্ৰৱা আৰক্ষীয়ে অভিযোগ পোৱাৰ পিছতো নীৰৱ দৰ্শক হৈ বজাৰখন চলিবলৈ সুযোগ দিয়া পৰিলক্ষিত হৈছে ।
আটাইতকৈ ভয়ংকৰ দিশটো হল,এই মাছৰ বজাৰখনৰ পৰা মাত্ৰ ৫০ মিটাৰ দূৰত্বত থকা বটদ্ৰৱা শংকৰদেৱ মহাবিদ্যালয়ত স্থাপন কৰা হৈছে এটা কোৱাৰেণ্টাইন শিবিৰ । ইয়াৰ পিছতো নিতৌ পুৱা আৰু বিয়লি ব্যৱসায়ী সকলে কেনেকৈ এই বজাৰখন চলাই যাবলৈ সক্ষম হৈছে সেই লৈ উত্থাপন হৈছে প্ৰশ্ন ।
উল্লেখনীয় যে এপষেক পূৰ্বে বটদ্ৰৱা থানৰ সন্মুখৰ এজন হোটেল ব্যৱসায়ীৰ দেহত ক'ভিড-১৯ৰ ভাইৰাছ ধৰা পৰিছিল । তাৰ পিছতো স্থানীয় প্ৰশাসনে এই মাছৰ বজাৰখন বন্ধ নকৰাৰ ফলত এক প্ৰত্যাহ্বানৰ যে সন্মুখীন হ'ব লাগিব সেইয়া প্ৰায় নিশ্চিত ।
