কলিয়াবৰ, 28 আগষ্ট : আজি অৰ্থাৎ দেওবাৰে অনুষ্ঠিত হ’ল অসম চৰকাৰৰ বিভিন্ন বিভাগৰ তৃতীয় বৰ্গৰ পৰীক্ষা ৷ এটা চাকৰিৰ বাবে দৌৰি আহিল বহু হাজাৰ হাজাৰ চাকৰি প্ৰত্যাশী ৷ কিন্তু পুৱাই পৰীক্ষা দিবলৈ আহি বিমোৰত পৰিল শতাধিক পৰীক্ষাৰ্থী ৷ কিয়নো ৰাজপথত অভাৱনীয় হাৰত বৃদ্ধি হ’ল যানজঁট (Traffic jam at Kaliabor) ৷
বিশেষকৈ কলিয়াবৰৰ চুলুঙত পুৱাৰ ভাগত হোৱা তীব্ৰ যানজঁটে ত্ৰাহিমধুসূদন সুৱঁৰালে পথাচাৰিক ৷ তথ্য অনুসৰি, আজি চুলুঙৰ ৰাজপথত আবদ্ধ হৈ পৰা শতাধিক যান-বাহনেই হৈছে পৰীক্ষাৰ্থীৰ ৷ এই পৰীক্ষাৰ্থীসকল আহিছিল তেজপুৰৰ বিভিন্ন কেন্দ্ৰত পৰীক্ষা দিবলৈ ৷ এফালে আজি মুষলধাৰ বৰষুণৰ ৷ আনফালে কলিয়াভোমোৰা সেঁতুৰ ওপৰত সৃষ্টি হোৱা যানজঁট ৷
ইয়াৰ মাজত সুকলমে অনুষ্ঠিত হ’ল তৃতীয় বৰ্গৰ নিযুক্তি পৰীক্ষা ৷
অৱশ্যে একাংশই সামাজিক মাধ্যমযোগে পৰীক্ষাৰ্থীয়ে ধেমালিৰ চলেৰে উজাৰিলে ক্ষোভ ৷ উল্লেখ্য যে, আজি তৃতীয় বৰ্গৰ পদৰ নিযুক্তি পৰীক্ষাত অৱতীৰ্ণ হৈছে ৰাজ্যৰ 8,52,181 গৰাকী শিক্ষিত যুৱক-যুৱতী (Assam Grade 3 recruitment written exam)৷
যোৱা 21 আগষ্টত অভূতপূৰ্ব নিৰাপত্তা ব্যৱস্থাৰ মাজেৰে চতুৰ্থ বৰ্গৰ নিযুক্তি পৰীক্ষা অনুষ্ঠিত হৈ যোৱাৰ পাছত দেওবাৰেও অনুৰূপ নিৰাপত্তা বেষ্টনীৰ মাজেৰে পৰীক্ষা অনুষ্ঠিত কৰাৰ বাবে যো-জা চলাইছিল ৰাজ্য চৰকাৰে (Assam recruitment exam 2022)৷ 21 আগষ্টৰ দৰেই 28 আগষ্টৰ পৰীক্ষাত নিষিদ্ধ কৰা হ’ল ম’বাইল ফোনৰ লগতে সকলো ইলেক্ট্ৰনিক সামগ্ৰী (Internet ban during exam hour)৷
প্ৰতিগৰাকী পৰীক্ষাৰ্থীক পৰীক্ষা কৰা হ’ল তন্ন-তন্নকৈ ৷ ইফালে যানজঁটৰ বাবে যাতে কোনো পৰীক্ষাৰ্থীয়ে পৰীক্ষা হলত উপস্থিত হোৱাত পলম নহয় তাৰ প্ৰতিও আগতীয়াকৈ জনাই দিয়া হৈছিল ৷ কিন্তু ইমানৰ পাচতো দেওবাৰে পুৱাৰ ভাগত দেখা গৈছিল এক অভূতপূৰ্ব পৰিস্থিতি ৷
লগতে পঢ়ক : পৰীক্ষাৰ্থীক কলম-চকলেট যাঁচি শুভেচ্ছা আৰক্ষীৰ
