ৰহাত বোৱাৰীৰ ৰহস্যজনক মৃত্যু

ৰহাৰ অন্তৰ্গত শিলভেটাত এগৰাকী বোৱাৰীৰ মৃত্যুক লৈ সৃষ্টি হৈছে চাঞ্চল্য ৷ আফছানা বেগম নামৰ বোৱাৰী গৰাকীৰ মৃত্যু আত্মহত্যা নে পৰিকল্পিত হত্যাকাণ্ড সেয়া আৰক্ষীয়ে এই পৰ্যন্তলৈ প্ৰকাশ কৰা নাই ৷ আফছানাৰ পিতৃ পৰিয়ালৰ অভিযোগ মৰ্মে ই এক পৰিকল্পিত হত্যাকাণ্ড ৷ এটি সন্তানৰ মাতৃ আছিল বোৱাৰীগৰাকী ৷

ৰহা,18 জানুৱাৰীঃ ৰহাৰ শিলভেটাত শনিবাৰে পোহৰলৈ আহিছে ৰহস্যজনকভাৱে মৃত্যুক সাৱটি লোৱা এগৰাকী বোৱাৰীৰ কাহিনী ৷ বোৱাৰীজনীৰ মৃত্যুৰ ফলত অঞ্চলটোত সৃষ্টি হৈছে তীব্ৰ চাঞ্চল্যৰ ৷ ঘটনাৰ বিৱৰণী মতে,মৃত বোৱাৰী গৰাকীৰ নাম আফছানা বেগম ৷ ৰহাৰ অন্তৰ্গত শিলভেটাৰ ৰছিদুল হ’কৰ পত্নী তথা এবছৰীয়া সন্তানৰ মাতৃ আফছানাৰ শুকুৰবাৰে মৃতদেহ ঘৰৰ ভিতৰতে অগ্নিদগ্ধ অৱস্থাত উদ্ধাৰ কৰা হয় ৷ স্বামী পৰিয়ালে আফছানাই কেৰাচিন ঢালি জুই লগাই আত্মহত্যা কৰা বুলি দাবী কৰাৰ বিপৰীতে আফছানাৰ পিতৃ পৰিয়ালে ইয়াক পৰিকল্পিত হত্যাকাণ্ড বুলিহে দাবী কৰে ৷

পিতৃ পৰিয়ালৰ অভিযোগ মৰ্মে,শাহুৱেক,শহুৰেক আৰু ননদে মিলি আফছানাক হত্যা কৰি কেৰাচিন ঢালি জ্বলাই দিয়ে ৷ পিছত হত্যাৰ ঘটনাটোক আত্মহত্যাৰ ৰূপ দিবলৈ বিচাৰে ৷ তদুপৰি বিয়াৰ পিছৰ পৰাই আফছানাৰ স্বামী পৰিয়ালে যৌতুক বিচাৰি বোৱাৰীগৰাকীৰ ওপৰত শাৰীৰিক-মানসিকভাৱে অত্যাচাৰ চলাই আহিছিল । পূৰ্বে আফছানাৰ পিতৃয়ে শহুৰ পৰিয়ালক বিশ হাজাৰ টকা দিয়াৰ কথা সদৰী কৰে ৷

কিন্তু দীৰ্ঘদিনীয়া সংঘাতৰ পৰিণতিত বোৱাৰী গৰাকীয়ে মৃত্যুক আঁকোৱালি লয় ৷ সম্প্ৰতি এয়া হত্যা নে আত্মহত্যা সেয়া পোহৰলৈ অহা নাই ৷ ইতিমধ্যে আফছানাৰ পিতৃ পৰিয়ালে ৰহা থানাত শহুৰ,শাহু আৰু ননদৰ বিৰুদ্ধে এক অভিযোগ দাখিল কৰিছে । অভিযোগৰ ভিত্তিত আৰক্ষীয়ে তিনিওজন ব্যক্তিকে আটক কৰি সোধ-পোছ অব্যাহত ৰাখে ।

লগতে চাওকঃপৰম্পৰাগত ৰীতি নীতিৰে ধেমাজি জিলাৰ জোনাই মহকুমাত আলি আয়ে লৃগাঙৰ লাইখুঁটা স্থাপন