হায়দৰাবাদ: আজি বৰদিন ৷ বৰদিন উপলক্ষে সমগ্ৰ বিশ্বজুৰি ব্যাপক উছাহ পৰিলক্ষিত হৈছে ৷ সমান্তৰালভাৱে,আৰম্ভ হৈছে নৱবৰ্ষ উদযাপনৰ প্ৰস্তুতি ৷ কিন্তু আপুনি জানেনে যে ভাৰতীয়-আমেৰিকান মহাকাশচাৰী সুনীতা উইলিয়ামছে মহাকাশতে নৱবৰ্ষ-বৰদিন উদযাপনৰ বাবে প্ৰস্তুতি চলাইছে । যোৱা কেইবামাহো ধৰি সতীৰ্থ মহাকাশচাৰী বাচ্চ উইলম'ৰৰ সৈতে আন্তঃৰাষ্ট্ৰীয় মহাকাশ কেন্দ্ৰত আৱদ্ধ হৈ আছে সুনীতা উইলিয়ামছ । শেহতীয়াকৈ স্পেচএক্স ড্ৰেগনে মহাকাশত আৱদ্ধ হৈ থকা মহাকাশচাৰীসকলক অত্যাৱশ্যকীয় সামগ্ৰী যোগান ধৰে, য’ত বৰদিন আৰু নৱবৰ্ষ উদযাপনৰ বাবে কিছুমান উৎসৱমুখৰ সামগ্ৰী আৰু উপহাৰো অন্তৰ্ভুক্ত কৰা হৈছে ।
মহাকাশত বৰদিন উদযাপনৰ প্ৰস্তুতি
To everyone on Earth, Merry Christmas from our @NASA_Astronauts aboard the International @Space_Station. pic.twitter.com/GoOZjXJYLP
— NASA (@NASA) December 23, 2024
নাছাই নিজৰ ‘এক্স’ একাউণ্টৰ জৰিয়তে এটা ভিডিঅ’ শ্বেয়াৰ কৰিছে, য’ত সুনীতা উইলিয়ামছ আৰু তেওঁৰ সতীৰ্থ মহাকাশচাৰীসকলক আন্তঃৰাষ্ট্ৰীয় মহাকাশ কেন্দ্ৰত বৰদিন উদযাপন কৰা দেখা গৈছে । লগতে তেওঁলোকে সমগ্ৰ বিশ্বক বৰদিন আৰু নৱবৰ্ষৰ শুভেচ্ছা জনাইছে । সুনীতা উইলিয়ামছে কয়, "আমি বৰদিন উদযাপন কৰিবলৈ সাজু হৈছো, মহাকাশ কেন্দ্ৰত পৰিয়ালৰ সদস্যৰ সৈতে বৰদিন উদযাপন কৰাৰ এয়া এক সুন্দৰ সময় । ইয়াত আমাৰ সাতজন লোক আছে আৰু আমি সকলোৱে একেলগে উদযাপন কৰিবলৈ ওলাইছো ।"
মহাকাশচাৰীসকলে জুতি ল’ব পাৰিব ঘৰুৱা খাদ্যৰ
সুনীতা আৰু তেওঁৰ দলটোৱে পৃথিৱীৰ পৰা পঠোৱা সতেজ উপাদানৰে তৈয়াৰী সতেজ খাদ্য উপভোগ কৰিবলৈ সাজু হৈছে যাতে তেওঁলোকে মহাকাশত থকাৰ সময়ত বৰদিনৰ পৰম্পৰাত অংশগ্ৰহণ কৰিব পাৰে । এই সকলোবোৰ সম্ভৱ হৈছে মালবাহী ডেলিভাৰীৰ জৰিয়তে যিয়ে মহাকাশত মহাকাশচাৰীৰ অনন্য পৰিৱেশলৈ অত্যাৱশ্যকীয় সামগ্ৰীয়েই নহয় ঘৰুৱা সোৱাদযুক্ত খাদ্যও যোগান ধৰে ।
বিশেষ বৰদিনৰ খাদ্যৰ লগতে সুনীতা আৰু তেওঁৰ সতীৰ্থ মহাকাশচাৰীসকলেও ভিডিঅ’ কলৰ জৰিয়তে আপোনজনৰ সৈতে সংযোগ স্থাপন কৰিব যাতে এই দীঘলীয়া মহাকাশ অভিযানৰ সময়ছোৱাত তেওঁলোকৰ স্বাস্থ্য ভাল হৈ থাকে ।
সুনীতা উইলিয়ামছ আৰু তেওঁৰ সংগী বাচ্চ উইলম'ৰে আঠদিনীয়া অভিযানৰ উদ্দেশ্য মহাকাশলৈ গৈছিল যদিও তেওঁলোকৰ মহাকাশযানখনত হোৱা কাৰিকৰী বিজুতিৰ বাবে যোৱা কেইবামাহো তেওঁলোকে আন্তঃৰাষ্ট্ৰীয় মহাকাশ কেন্দ্ৰত থাকিবলগীয়া হৈছে । 2025 চনৰ ফেব্ৰুৱাৰী মাহত তেওঁলোক পৃথিৱীলৈ ঘূৰি অহাৰ সম্ভাৱনা আছে ।
মহাকাশত থকা সময়ছোৱাত উইলিয়ামছে পৃথিৱীৰ ছাত্ৰ-ছাত্ৰীৰ বাবে বহুতো শিক্ষামূলক অধিৱেশনতো অংশ লৈছে । এই সময়ত তেওঁ ছাত্ৰ-ছাত্ৰীসকলক মাইক্ৰ’গ্ৰেভিটি আৰু মহাকাশ অন্বেষণৰ সময়ত জীৱন যাত্ৰাৰ বিষয়ে কয় ।
