কলিয়াবৰ, 4 মাৰ্চ: মধ্য অসমৰ বুকুৰ হাড় স্বৰূপ কলং সূঁতি ৷ বছৰ বছৰ বন্ধ হৈ আছিল হাতীমূৰাৰ কলঙৰ মুখ ৷ কলঙক পুনৰ বোৱাই নিয়াৰ বাবে ২০২০ চনৰ অক্টোবৰতে জলসম্পদ বিভাগে হাতত লৈছিল এক প্ৰকল্প ৷ প্ৰকল্পৰ নাম দিয়া হৈছিল প্ৰজেক্ট চিগনেচাৰ (Project signature in Kolong river) ৷ পুঁজি নিৰ্ধাৰণ কৰা হৈছিল প্ৰায় ১৩৫ কোটি টকা ৷ সেই সময়ত জলসম্পদ মন্ত্ৰী আছিল কলিয়াবৰৰ বিধায়ক কেশৱ মহন্ত (Minister Keshab Mahanta) ৷
এতিয়া মন্ত্ৰী সলনি হ’ল, কিন্তু গেথেলা মাৰিলে কলং বোৱাই নিয়াৰ অভিলাসী প্ৰকল্পই ৷ পূৰ্বৰ জলসম্পদ মন্ত্ৰী গৰাকীৰ দিনত আৰম্ভ হোৱা আঁচনিখনৰ কাম বৰ্তমানৰ জলসম্পদ মন্ত্ৰী পীযুষ হাজৰিকাই (Water resource minister Pijush Hazarika) বিগত বৰ্ষৰ অক্টোবৰৰ পৰা পুনৰ আৰম্ভ কৰাৰ কথা কৈছিল ৷ কিন্তু এই বৰ্ষৰ ফেব্ৰুৱাৰী মাহৰ পৰাহে চেগা-চোৰোকাকৈ কাম আৰম্ভ হোৱা দেখা গৈছে ।
ইমান এটা বৃহৎ তথা স্পৰ্শকাতৰ নিৰ্মাণত যিধৰণৰ নিৰ্মাণ সঁজুলি ব্যৱহাৰ কৰিছে, তাৰ পৰাই প্ৰমাণ হয় যে খৰতকীয়াকৈ আঁচনিখন ৰূপায়ণত কোনো সদিচ্ছা নাই বিভাগ বা ঠিকাদাৰৰ । ফলস্বৰূপে তিনি মাহতে সম্পূৰ্ণ হোৱা কলিয়াবৰৰ হাতীমূৰাৰ কলংমুখত নিৰ্মিত জলদ্বাৰ সম্পূৰ্ণ নহ'ল দুবছৰেও ।
উল্লেখ্য যে বিগত বৰ্ষৰ ২৩ মে’ত কলিয়াবৰৰ হাতীমূৰাৰ কলং মুখৰ কাম পৰিদৰ্শন কৰি উপস্থিত হৈ জলসম্পদ মন্ত্ৰী পীযুষ হাজৰিকাই কৈছিল যে নগাওঁবাসীৰ আত্মাত সোমাই আছে কলং । এই কলং খনক আমি ৰক্ষা কৰিব লাগিব ৷" কামটো কেশৱ দাই আৰম্ভ কৰিছিল মই শেষ কৰিম ৷
কিন্তু শেষ কেতিয়া হ’ব সেয়াহে অজ্ঞাত ৷ ২৪ ঘণ্টাই কাম কৰি তিনি মাহৰ ভিতৰত কলংমুখত শ্লুইছগেট নিৰ্মাণ সম্পূৰ্ণ কৰাৰ প্ৰতিশ্ৰুতি দিছিল মন্ত্ৰী গৰাকীয়ে । কিন্তু কাম আৰম্ভ কৰাৰ ডেৰ বছৰ পাৰ হৈ যোৱাৰ পিছতো আজিলৈকে কলং বোৱতী নহ’ল । জলসম্পদ বিভাগৰ এনে হেমাহিত এতিয়া কলং বোৱতী প্ৰকল্প কলিয়াবৰ তথা নগাঁও জিলাবাসীৰ সপোন হৈ ৰৈছে ।
উল্লেখ্য যে, ১৯৬৩ চনত ব্ৰহ্মপুত্ৰৰ বানৰ পৰা মধ্য অসমক ৰক্ষা কৰিবলৈ হাতীমূৰাত বন্ধ কৰি দিয়া হৈছিল কলঙৰ মুখ । তাৰ লগে লগে মৃত্যু ঘটিছিল নগাঁৱৰ প্ৰাণস্পন্দন বোৱতী কলঙৰ । পূৰ্বৰ জলসম্পদ মন্ত্ৰী কেশৱ মহন্তই ২০২০ চনৰ ৩০ অক্টোবৰত আৰম্ভ কৰা কলংমুখৰ কাম বৰ্তমানৰ জলসম্পদ মন্ত্ৰী পীয়ুয হাজৰিকাই সম্পূৰ্ণ কৰি তুলিব পাৰিবনে ৷ সেয়া সময়েহে ক’ব ৷
লগতে পঢ়ক : 2026 চনৰ ভিতৰত মাজুলী সংযোগী দুখন দলং সম্পূৰ্ণ হ’ব: মুখ্যমন্ত্ৰী
