নগাওঁ, 18 ডিচেম্বৰ: 2021 ৰ 8, 9 আৰু 10 জানুৱাৰীত তিনিদিনীয়াকৈ নগাঁৱৰ নেহেৰুৱালীত ৪৮ তম অসম ৰাজ্যিক দেহশ্ৰী প্ৰতিযোগিতা অনুষ্ঠিত হ'ব ৷ নগাঁও পৰ্যটন নিবাসৰ সভাকক্ষত এক সংবাদ মেল সম্বোধন কৰি ৰাজ্যিক এছোচিয়েশ্যনৰ উপ সভাপতি তথা নগাঁও সদৰ সমষ্টিৰ বিধায়ক ৰূপক শৰ্মাই ৰাজ্যিক পৰ্য্যায়ত অনুষ্ঠিত হ'বলগীয়া এই প্ৰতিযোগিতাৰ কথা আনুষ্ঠানিকভাৱে ঘোষণা কৰে ৷
অসম বডি বিল্ডিং আৰু ফিটনেছ এছ'চিয়েশ্যনৰ উদ্যোগত অনুষ্ঠিত হবলগীয়া এই প্ৰতিযোগিতাত পুৰুষ মহিলা দুয়োটা শাখাই অংশগ্ৰহণ কৰিব পাৰিব বুলি শৰ্মাই জানিবলৈ দিয়ে ৷ এই প্ৰতিযোগিতাতেই মিষ্টাৰ অসম আৰু মিচ অসম বাছনি কৰা হব ৷ উল্লেখ্য যে দিব্যাংগসকলৰ অংশগ্ৰহণৰ বাবে এই প্ৰতিযোগিতাত বিশেষ ব্যৱস্থা গ্ৰহণ কৰা হৈছে ৷ নগাঁৱত অনুষ্ঠিত হ'বলগীয়া এই ৰাজ্যিক প্ৰতিযোগিতাত ৰাষ্ট্ৰীয় পৰ্যায়ৰ প্ৰতিযোগিতাৰ বাবেও প্ৰতিযোগী বাছনি কৰা হ'ব বুলি জানিব পৰা গৈছে ৷
লগতে পঢ়ক:ৰূপহীহাটত কংগ্ৰেছী কৰ্মীয়ে বিজেপি কৰ্মীক প্ৰহাৰ কৰাৰ অভিযোগ
