নগাঁও,16 এপ্ৰিলঃ দেশজুৰি ঘোষণা কৰা লক ডাউনৰ সময়ত নগাঁৱৰ দৰিদ্ৰ পৰিয়ালসমূহৰ কাষত উপস্থিত হয় একাংশ বন বিষয়া-কৰ্মচাৰী ৷ ৰঙালীৰ দিনকেইটাত এইসমূহ পৰিয়ালে যাতে খাদ্য সংকটত দিন পাৰ কৰিবলগীয়া নহয় তাৰ প্ৰতি বিশেষ গুৰুত্ব প্ৰদান কৰি ওলাই আহে নগাঁও-কাৰ্বি আংলং সীমান্তৱৰ্ত্তী পাৰ্কুপ বন আঞ্চলিক বিষয়া কাৰ্যালয়ৰ সমূহ বিষয়া-বনৰক্ষী ৷ নিজৰ দৰমহাৰ এটা অংশৰে প্ৰায় ডেৰ শতাধিক দৰিদ্ৰ পৰিয়ালক খাদ্যৰ লগতে প্ৰয়োজনীয় সামগ্ৰীৰ যোগান ধৰে বন কৰ্মচাৰীসকলে ৷ ইয়াৰ উপৰিও সামগ্ৰী বিতৰণৰ সময়ত সামাজিক দূৰত্ব মানি চলাৰ বাবেও সকলো লোককে আহ্বান জনোৱা হয় ৷
আনহাতে, উদমাৰি উপ-খণ্ড বন বিষয়াৰ কাৰ্যালয়ৰ কেশৱ শইকীয়া নামৰ এজন বনকৰ্মীয়ে পুৰণিগুদাম চলচলিৰ একাংশ দৰিদ্ৰ লোকক অত্যাৱশ্যকীয় খাদ্য সামগ্ৰীৰ সাহায্য আগবঢ়োৱাৰ লগতে সকলোৰে আগত আঠু লৈ আশীষ বিচাৰে ৷ অঞ্চলটোৰ প্ৰায় শতাধিক দৰিদ্ৰ পৰিয়ালক এনেদৰে সহায় আগবঢ়ায় বনকৰ্মী গৰাকীয়ে ৷ দেশজুৰি জৰুৰীকালীনৰ এই সময়ছোৱাত এনেদৰেই সকলো লোকেই নিজ নিজ সামৰ্থ অনুসৰি দৰিদ্ৰ লোকসকলক সহায়ৰ হাত আগবঢ়াই অহা পৰিলক্ষিত হৈছে ৷
লগতে পঢ়ক-টাইপত ভুল ! কাঁহ আৰু জ্বৰত আক্ৰান্ত ব্যক্তিক কৰ’ণাত আক্ৰান্ত ঘোষণা
