নগাঁও,10 জুন: প্ৰত্যেকেই দেখিছে সদৌ অসম ছাত্ৰ সন্থাৰ আন্দোলন ৷ কেতিয়াবা যদি ৰাজপথত,কেতিয়াবা আকৌ ব্যস্ত অনশনত ৷ কিন্তু এইবাৰ এক ব্যতিক্ৰমী আন্দোলন আৰম্ভ কৰিছে নগাঁও জিলা ছাত্ৰ সন্থাই । এই আন্দোলন থলুৱা বজাৰ দখলৰ আন্দোলন ৷ ইতিবাচক তথা ব্যতিক্ৰমী পদক্ষেপেৰে আত্মপ্ৰকাশ কৰাৰ চেষ্টা অব্যাহত ৰাখিছে সদৌ অসম ছাত্ৰ সন্থাৰ নগাঁও জিলা শাখাই ৷ এফালে পথাৰ,আনফালে বজাৰ দখল কৰিবলৈ তৎপৰ এই আন্দোলনৰ গুৰি ধৰিছে নগাঁও জিলা ছাত্ৰ সন্থাৰ সভাপতি গৌৰীশংকৰ শইকীয়া আৰু সম্পাদক অমৰজ্যোতি ফুকনে ।
জিলা ছাত্ৰ সন্থাৰ কাৰ্যালয়ৰ সমীপত বজাৰ আৰম্ভ কৰিবলৈ প্ৰস্তুতি সম্পূৰ্ণ কৰিছে সন্থাই ৷ ইতিমধ্যে নিৰ্মাণকাৰ্য সম্পূৰ্ণ হৈছে বজাৰগৃহৰ । বজাৰখনত থাকিব জৈৱিক পদ্ধতিৰে উৎপাদিত শাক-পাচলিৰ পৰা আৰম্ভ কৰি মাছ, মাংস,কণী পৰ্যন্ত সকলো অত্যাৱশ্যকীয় খাদ্য সামগ্ৰী ৷ অৰ্থনৈতিক ভেটি সুদৃঢ় কৰাৰ উদ্দেশ্যে গ্ৰহণ কৰা এনে পদক্ষেপৰ প্ৰথম খোজ হিচাপে সন্থাই আৰম্ভ কৰিবলগীয়া বজাৰত থাকিব জিলাখনৰ ১৬ খন আঞ্চলিকৰ ১৬ খন দোকান । বজাৰত বিক্ৰীৰ বাবে জিলাখনৰ আঞ্চলিক সমিতিসমূহে আৰম্ভ কৰিছে খেতি । উৎপাদিত সামগ্ৰী সুলভ মূল্যত বিক্ৰী কৰা হ’ব ছাত্ৰ সন্থাৰ এইখন বজাৰত । বজাৰখনত অংশগ্ৰহণৰ সুবিধা পাব লক ডাউনৰ ফলত চাকৰি হেৰুওৱা যুৱক-যুৱতীয়ে ।
লগতে চাওকঃ চিকিৎসালয় চৌহদত আত্মহনন ৰোগীৰ
