জাতীয়তাবাদৰ ভেটিত লালিত-পালিত মণি বলিষ্ঠ কণ্ঠ হ’বনে ?

জাতীয় সুৰক্ষাৰ স্বাৰ্থত আপোচবিহীন স্থিতিত অটল থকাৰ কথা উল্লেখ কৰা নেতাজনে অনাগত দিনত কিদৰে জাতীয় বিষয়সমূহ ৰাষ্ট্ৰীয় পৰ্যায়ত উত্থাপন কৰে সেয়াহে বৰ্তমান সময়ত এক ডাঙৰ প্ৰশ্ন ৷ জাতীয়তাবাদৰ ভেটিত লালিত-পালিত মণি মাধৱ মহন্তই ছাত্ৰ সন্থাৰ মজিয়াৰ পৰা জাতি আৰু মাটিৰ হকে চলাই থকা আপোচবিহীন যুঁজখন সংসদত অসমবাসীয়ে দেখিবলৈ পাবনে ?

নগাঁও, 24 মাৰ্চঃ লোকসভা নিৰ্বাচনক লৈ এতিয়া ৰাজনৈতিক দল আৰু প্ৰাৰ্থীৰ মাজত বাঢ়িছে ব্যাপক তৎপৰতা ৷ দেওবাৰে কলিয়াবৰ লোকসভা সমষ্টিৰ অগপ বিজেপি মিত্ৰজোঁটৰ প্ৰাৰ্থী মণিমাধৱ মহন্তই মনোনয়ন পত্ৰ দাখিল কৰাৰ পূৰ্বে আশীষ ল’লে বটদ্ৰৱা থানত ৷ গুৰুজনাৰ পৱিত্ৰ জন্মভূমি বটদ্ৰৱাত পাঁচদিনীয়া কাৰ্যসূচীৰে অনুষ্ঠিত হৈছে শ্ৰী কৃষ্ণৰ দৌলযাত্ৰা মহোৎসৱ ৷ মহোৎসৱ উপলক্ষে দেওবাৰে বটদ্ৰৱাত উপস্থিত হয়গৈ প্ৰাৰ্থীগৰাকী ৷ আসন্ন লোকসভা নিৰ্বাচনৰ বাবে সোমবাৰে কলিয়াবৰ লোকসভা সমষ্টিৰ পৰা অগপ দলৰ হৈ মনোনয়ন পত্ৰ দাখিল কৰিব মণি মাধৱ মহন্তই ৷

উল্লেখ্য যে, আসন্ন লোকসভা নিৰ্বাচনত অগপই বিজেপিৰ লগত মিত্ৰতা কৰিলেও নাগৰিকত্ব সংশোধনী বিধেয়কৰ বিৰুদ্ধে অগপই নিজৰ স্থিতিত অটল থকাৰ কথা উল্লেখ কৰে মণিমাধৱ মহন্তই ৷ আই ইউ ডি এফৰে লগত কংগ্ৰেছৰ ইতিমধ্যে মিত্ৰতা সম্পন্ন হোৱাৰ বাবে বদৰুদ্দিন আজমলে কলিয়াবৰত প্ৰাৰ্থী দিয়া নাই বুলি কয় মহন্তই ৷ নিজকে একুৰিয়ামৰ মাছ নহয় বুলি কৈ খাল, বিল ,নদীৰ মাছ মণিমাধৱ মহন্তই মা, মাতৃভাষা , আৰু মাতৃভূমিৰ ক্ষেত্ৰত আপোচবিহীন স্থিতিত অটল থাকিব বুলি কয় ৷ মূলতঃ কলিয়াবৰৰ ৰাইজৰ সমস্যা আৰু সীমান্ত সুৰক্ষাৰ সমস্যা,কাজিৰঙাৰ সুৰক্ষা , বৰ লুইতৰ গৰাখহনীয়া সমস্যা , উদ্যোগীকৰণৰ সমস্যা , দুখীয়া কৃষকৰ সমস্যা সমূহক সংসদৰ মজিয়াত তুলি ধৰিবৰ বাবে সংসদীয় ৰাজনীতিলৈ অহা বুলি উল্লেখ কৰে সদ্য আছু ত্যাগী নেতাজনে ৷ জাতীয় সুৰক্ষাৰ স্বাৰ্থত আপোচবিহীন স্থিতিত অটল থকাৰ কথা উল্লেখ কৰা নেতাজনে অনাগতদিনত কিদৰে জাতীয় বিষয়সমূহ ৰাষ্ট্ৰীয় পৰ্যায়ত উত্থাপন কৰে সেয়াহে বৰ্তমান সময়ত এক ডাঙৰ প্ৰশ্ন ৷ জাতীয়তাবাদৰ ভেটিত লালিত-পালিত মণি মাধৱ মহন্তই ছাত্ৰ সন্থাৰ মজিয়াৰ পৰা জাতি আৰু মাটিৰ হকে চলাই থকা আপোচবিহীন যুঁজখন সংসদত অসমবাসীয়ে দেখিবলৈ পাবনে ? সংকটাপন্ন ক্ষণত জাতিৰ হকে থিয় দি জাতীয়তাবাদৰ মজিয়াৰ পৰা দিল্লীলৈ মন মেলা নেতাগৰাকীৰ স্থিতি কি হ’ব সেয়াও সময়েহে ক’ব ৷