কলিয়াবৰ,২৫ মাৰ্চ: কলঙৰ পাৰত ভয়াবহ গৰাখহনীয়া । অবিবেচকীভাৱে কলঙৰ পাৰৰ প্ৰকাণ্ড গছবোৰ কাটি পেলোৱাৰ ফলতেই খহনীয়া সৃষ্টি হোৱাৰ অভিযোগ স্থানীয় ৰাইজৰ । অবৈজ্ঞানিক পদ্ধতিৰে খনন কৰাৰ ফলতেই এখন শিক্ষানুষ্ঠানলৈকো নামি আহিছে অশনি সংকেট (Bad impact to the educational institute) ।
জখলাবন্ধাৰ শ্ৰীশ্ৰীৰমানন্দদেৱ উচ্চ মাধ্যমিক বালিকা বিদ্যালয়ৰ সন্মুখেৰে বৈ যোৱা কলঙৰ পাৰৰ ভয়াবহ খহনীয়াৰ সৃষ্টি হৈছে । মৃত কলঙক বোঁৱাই নিয়াৰ স্বাৰ্থত খনন কাৰ্য্যৰ লগতে কলঙৰ পাৰ বন্ধাৰ নামত অবিবেচকভাৱে কলঙৰ পাৰত থকা প্ৰকাণ্ড গছসমূহ কাটি পেলোৱাৰ বাবে খহনীয়াৰ সৃষ্টি হোৱাৰ অভিযোগ উত্থাপিত হৈছে । ইফালে বাৰিষাৰ প্ৰাকমূহুৰ্তত সমগ্ৰ অঞ্চলটোত খহনীয়াই ৰুদ্ৰৰূপ লোৱাৰ আশংকা ঘণীভূত ।
আনহাতে, নিয়ন্ত্ৰিতভাৱে কলঙৰ বুকুৱেদি লুইতৰ পানী প্ৰৱাহিত হোৱাটো দূৰৈৰ কথা, প্ৰদূষণমুক্ত নহ’ল কলং । সম্প্ৰতি 'ডাষ্টবিন'তহে যেন পৰিণত হৈছে কলং । জখলাবন্ধাৰ একাংশ ব্যৱসায়ীৰ লগতে অঞ্চলটোৰ বহু লোকে প্ৰতিদিনে কলঙত জাবৰ-জোঁথৰ পেলাই অহাৰো অভিযোগ উত্থাপিত হৈছে ।
লগতে পঢ়ক: গৃহস্থৰ চকুৰ সন্মুখতে দাউদাউকৈ জ্বলি ছাঁই হ’ল প্ৰায় 20 টাকৈ বাসগৃহ
