নগাঁৱত স্বামী পৰিয়ালে বোৱাৰীক হত্যাৰ চেষ্টা চলোৱাৰ অভিযোগ

স্বামী ঘৰত নথকাৰ সুযোগলৈ শহুৰ-শাহু আৰু স্বামী পৰিয়ালে বোৱাৰী ইয়াচমিনাক হত্যাৰ চেষ্টা চলোৱাৰ অভিযোগ ৷ স্থানীয় লোকৰ সহযোগত প্ৰাণ ৰক্ষা পৰে বোৱাৰী গৰাকীৰ ৷

বঢ়মপুৰ , 24 এপ্ৰিলঃ নগাঁৱৰ কঠিয়াতলীত এগৰাকী বোৱাৰীক স্বামী পৰিয়ালে হত্যাৰ চেষ্টা চলোৱাৰ অভিযোগ উত্থাপিত হৈছে ৷ এই সন্দৰ্ভত স্বামীৰ পৰিয়ালৰ বিৰুদ্ধে এজাহাৰ দাখিল ভুক্তভোগীৰ ৷

ঘটনাৰ বিৱৰণী অনুসৰি মোৰাঝাৰৰ সাৱাজপুৰ গাঁৱৰ ইয়াচমিনা বেগমৰ নগাঁও ৰাঙলু বুঢ়াবাৰী গাঁৱৰ চাদ্দাম হোচেইনৰ লগত বিবাহ হৈছিল ৷ তেনে সময়তে 19 এপ্ৰিলৰ নিশা ইয়াচমিনাৰ স্বামী ঘৰত নথকাৰ সুযোগলৈ শহুৰ-শাহু আৰু স্বামী পৰিয়ালে তেওঁক মাৰপিট কৰাৰ ওপৰিও হত্যাৰ চেষ্টা চলোৱা অভিযোগ উত্থাপিত কৰে ইয়াচমিনে ৷ ইয়াতে ক্ষান্ত নাথাকি স্বামী পৰিয়ালে ইয়াচমিনাক পিতৃ গৃহলৈ খেদি পঠিয়াই বুলিও অভিযোগ দিয়ে বোৱাৰী গৰাকীয়ে ৷ আনহাতে ভুক্তভোগী ইয়াচমিনাই কঠিয়াতলী আৰক্ষী চকীত উপস্থিত হৈ স্বামী পৰিয়ালৰ বিৰুদ্ধে এজাহাৰ দিবলৈ আৰক্ষী বিষয়া নৰেন চন্দ্ৰ ৰাভাক অনুৰোধ জনায় ৷ কিন্তু আৰক্ষী বিষয়াজনে ভয় ভাবুকি আৰু বল পূৰ্বক ভাৱে দুয়ো পক্ষৰ মাজত আপোচ মীমাংসা কৰাৰ চেষ্টা চলোৱাৰ অভিযোগ উত্থাপন কৰে ইয়াচমিনাই ৷ পৰৱৰ্তী সময়ত ঘটনাস্থলীত সাংবাদিক উপস্থিত হোৱাত কঠিয়াতলি আৰক্ষী বিষয়া ৰাভাই এজাহাৰ ল'বলৈ বাধ্য হয় ৷ ইতিমধ্য ঘটনা সন্দৰ্ভত বোৱাৰী গৰাকীৰ স্বাস্থ্য পৰীক্ষা কৰোৱা হৈছে যদিও এই পৰ্যন্ত অভিযুক্ত স্বামী পৰিয়ালৰ কোনো সদস্যক আৰক্ষীয়ে সোধপোচৰ বাবে আটক কৰা নাই ৷