নগাঁও,7 জুন: আজি গীতি-কবি পাৰ্বতী প্ৰসাদ বৰুৱাৰ 57 সংখ্য়ক মৃত্যু তিথি ৷ শিৱসাগৰৰ দিখৌপাৰত ১৯০৪ চনৰ ১৯ আগষ্টত জন্মগ্ৰহণ কৰা পাৰ্বতি প্ৰসাদ বৰুৱাই জীৱনৰ বেছিভাগ সময় সোণাৰিৰ সোণালীপাম নামৰ গৃহত অতিবাহিত কৰিছিল ৷ এই সোণালী পামৰ নিগাজী ঘৰত বহিয়েই শিল্পী গৰাকীয়ে ৰচনা কৰিছিল বহু গীত আৰু কবিতা ৷ সেই ঘৰটোৰ পৰাই অসমীয়া সাহিত্যলৈ উল্লেখনীয় অৱদান আগবঢ়োৱা এই গৰাকীৰ শিল্পীৰ মৃত্যু হৈছিল ১৯৬৪ চনৰ আজিৰ দিনটোতে ৷
উল্লেখ্য যে, সৰু-চৰাইত 'জোনাকী মেল'ৰ পাতনি মেলা গীতিকবি পাৰ্বতী প্ৰসাদ বৰুৱা অসমীয়া সাংস্কৃতিক জগতখনৰ এগৰাকী চিৰনমস্য পুৰোধা ব্যক্তি। তেওঁ চতুৰ্থখন অসমীয়া ছবি 'ৰূপহী'ৰ নিৰ্মাতা, নাট্যকাৰ যদিও মূলত গীতি-কবিতাৰে অসমীয়া সাহিত্য জগতত এক সুকীয়া স্থান দখল কৰিছিল । পাৰ্বতী প্ৰসাদৰ গীত-কবিতাসমূহে সুধাকণ্ঠ ড৹ ভূপেন হাজৰিকাৰ সান্নিধ্যত এক নতুন পৰিচয় লাভ কৰিছিল ৷ পাৰ্বতী প্ৰসাদ বৰুৱাই গীত-কবিতাসমূহক সুৰ দি নিজে কণ্ঠদান কৰি যি অমৰত্ব প্ৰদান কৰিলে, সেই গীতে অসমীয়া সংগীত জগতখনক চহকী কৰি ৰাখিব যুগ-যুগান্তৰলৈ ।
গীতিকবি পাৰ্বতী প্ৰসাদ বৰুৱাৰ মৃত্যু দিৱসত শ্ৰদ্ধা জনাই দৰদী শিল্পী প্ৰয়াত জয়ন্ত হাজৰিকাৰ অমৰ কণ্ঠত প্ৰাণ পাই উঠা “আপোন হাতে ঘৰ ভাঙিলি” গীতটিৰ হিন্দী ৰূপান্তৰ কৰিছে সংবাদকৰ্মী ৰূপজ্যোতি গোস্বামীয়ে ৷ গীতটো বাণীবন্ধন কৰিছে পঞ্চম ভূমিজে ৷
লগতে পঢ়ক: Etv Bharat ৰ বাতৰিৰ প্ৰভাৱ: জকাইত বৃদ্ধ দম্পতীক আগবঢ়ালে সহায়
