কলিয়াবৰ, 30 এপ্ৰিল: ৰাজ্যত অবাধে বিক্ৰি হৈ আছে বহিঃৰাজ্যৰ ফৰ্মেলিনযুক্ত মাছ ৷ কুম্ভকৰ্ণ নিদ্ৰাত অসম চৰকাৰৰ মীন বিভাগ ৷ নগাঁও মহাবিদ্যালয়ৰ পৰীক্ষাত চালানী মাছত মাৰাত্মক ফৰ্মেলডিহাইডৰ উপস্থিতি ধৰা পৰাৰ পাচতেই এতিয়া সৰ্বত্ৰে সৃষ্টি হৈছে প্ৰতিক্ৰিয়াৰ ৷ কলিয়াবৰত অসম জাতীয়তাবাদী যুৱ ছাত্ৰ পৰিষদে চালানী মাছৰ আমদানি বন্ধ কৰাৰ দাবীত মুখ্যমন্ত্ৰীলৈ প্ৰেৰণ কৰিলে স্মাৰক পত্ৰ (AJYCP submits memorandum to CM) ৷
শেহতীয়াকৈ নগাঁও মহাবিদ্যালয়ৰ প্ৰাণী বিজ্ঞান বিভাগৰ পৰীক্ষাগাৰত ধৰা পৰা চালানী মাছত ফৰ্মেলিনৰ লগতে কেডমিয়াম, আৰ্চেনিকৰ উপস্থিতিৰ তথ্যই সমগ্ৰ অসমবাসীৰ লগতে কলিয়াবৰবাসীকো উদ্বিগ্ন কৰি তুলিছে ৷ নগাঁও মহাবিদ্যালয়ৰ অধ্যক্ষ ড৹ শৰৎ বৰকটকীৰ নিৰ্দেশত মহাবিদ্যালয়খনৰ প্ৰাণীবিজ্ঞান বিভাগে বজাৰত উপলব্ধ চালানী মাছত বিষাক্ত পদাৰ্থৰ উপস্থিতিৰ অধ্যয়নৰ বাবে এলানি পৰীক্ষা সম্পন্ন কৰিছিল ৷
এই পৰীক্ষাত দলটোৱে নগাঁও জিলাৰ বিভিন্ন ব্যৱসায়িক এলেকাৰ পৰা নমুনা সংগ্ৰহ কৰি প্ৰাণীবিজ্ঞান বিভাগৰ গৱেষণাগাৰত পুংখানুপুংখভাৱে অধ্যয়ন কৰাৰ লগতে তথ্যৰ শুদ্ধতা নিৰূপণৰ বাবে গুৱাহাটীস্থিত উন্নতমানৰ পৰীক্ষাগাৰতো পৰীক্ষা সম্পন্ন কৰে ৷ এই দুয়োলানি পৰীক্ষাত উদ্বেগকজনকভাৱে চালানী মাছত সৰ্বাধিক ১৫ শতাংশলৈকে ফৰ্মেলডিহাইডৰ উপস্থিতি ধৰা পৰে (Demanding ban on Formaldehyde fish) ৷
তদুপৰি দলটিয়ে চালানী মাছত মানৱ শৰীৰৰ বাবে অপকাৰী গুৰু ধাতু যেনে – কেডমিয়াম, প্ৰমিয়াম, আৰ্চেনিক, লিড আদিৰ উপস্থিতি সম্পৰ্কেও অধ্যয়ন অব্যাহত ৰাখিছে ৷ এই অধ্যয়নৰ প্ৰতিবেদন ৰাজহুৱা হোৱাৰ পাচতেই কলিয়াবৰতো সৃষ্টি হৈছে ব্যাপক প্ৰতিক্ৰিয়াৰ (Demanding ban on Formaldehyde fish) ৷ অসম জাতীয়তাবাদী যুৱ ছাত্ৰ পৰিষদৰ কলিয়াবৰ জিলা সমিতিয়ে ৰাজ্যৰ মুখ্যমন্ত্ৰীলৈ ফৰ্মেলিনযুক্ত চালানী মাছৰ আমদানী বন্ধ কৰাৰ দাবীত প্ৰেৰণ কৰিছে এক স্মাৰক পত্ৰ ৷ তদুপৰি, সৰ্বসাধাৰণ ৰাইজৰ জ্ঞাতাৰ্থে বিষাক্ত ফৰ্মেলিনযুক্ত মাছৰ পৰা হ'ব পৰা বিপদৰ বিষয়ে অৱগত কৰিবলৈ প্ৰশাসনক অনুৰোধ জনাইছে সংগঠনটোৱে (Reaction on Formaldehyde Fish) ৷
অসম বিজ্ঞান সমিতি, কলিয়াবৰ শাখাৰ সম্পাদক তথা কলিয়াবৰ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ ভূপেন শৰ্মাই জনোৱা মতে, ফৰ্মেলিনযুক্ত মাছে মানৱ দেহত কেঞ্চাৰৰ সৃষ্টি কৰিব পাৰে ৷ তদুপৰি, পাকস্থলীৰ বিভিন্ন ৰোগে দেখা দিব পাৰে ৷ ৰন্ধাৰ পূৰ্বে চালানী মাছৰ পৰা ফৰ্মেলিন বিশেষ কিছু প্ৰক্ৰিয়াৰে কমাব পাৰি যদিও নোহোৱা কৰাতো সম্ভৱ নহয় বুলি মন্তব্য কৰে অৱসৰপ্ৰাপ্ত অধ্যক্ষগৰাকীয়ে ৷ সাধাৰণ ৰাইজৰ মাজত এনেধৰণৰ সচেতনতা সহজলভ্য নহয় ৷ সেয়ে, এনে মাছ নোখোৱাকৈ থকাই ভাল বুলি মন্তব্য কৰে তেওঁ (AJYCP submits memorandum against toxic fish supply) ৷
আনহাতে, অসমৰ নিচিনা নৈ-খাল-বিলেৰে পৰিপূৰ্ণ ৰাজ্য ভাৰতৰ আন কোনো প্ৰদেশতেই নাই ৷ কেৱল নগাঁও আৰু মৰিগাঁও জিলাতেই ৩৭৯ খন বিল আছে ৷ এনে প্ৰকৃতিক জলাশয়তে অসমক প্ৰয়োজন হোৱা মাছতকৈ অধিক থলুৱা মাছ উৎপাদন কৰিব পৰা সম্ভাৱনা আছে ৷ লগতে ৰাজ্যত এখন মীন মহাবিদ্যালয় আছে; তেওঁলোকেও এই বিষয়ত গৱেষণা কৰিব পাৰে ৷ থলুৱা মাছৰ ইমান চাহিদা থকাৰ পাচতো আমি কিয় অন্ধ্ৰ, কানপুৰৰ মাছ খাব লাগে; এই বিষয়টো এতিয়া ; চিন্তা কৰাৰ প্ৰয়োজন আহি পৰিছে বুলি মন্তব্য কৰে তেওঁ ৷ গতিকে ফৰ্মেলিনযুক্ত মাছৰ পৰা বাচিবলৈ চৰকাৰৰ উদ্যোগত ৰাজ্যতে মাছ উৎপাদনৰ বাবে এখন বিশেষ আচঁনিৰ উদ্যোগ লোৱাৰ পোষকতা কৰে অৱসৰপ্ৰাপ্ত অধ্যক্ষগৰাকীয়ে (Formaldehyde Fish in Assam) ৷
লগতে পঢ়ক: Laser show at Rang Ghar: ৰংঘৰত প্ৰধানমন্ত্ৰী মোডীৰ মন কী বাত অনুষ্ঠানক লৈ ৰাজ্যত মিশ্ৰিত প্ৰতিক্ৰিয়া
